Toshkent shahrida O‘zbekiston va Niderlandiya o‘rtasida siyosiy maslahatlashuvlarning navbatdagi davrasi bo‘lib o‘tdi. Bu haqda Tashqi ishlar vazirligi matbuot xizmati xabar berdi.
Qayd etilishicha, uchrashuvda siyosiy muloqotni faollashtirish, savdo-iqtisodiy va investitsiya sohalarida mavjud salmoqli salohiyatni ro‘yobga chiqarish, parlamentlararo aloqalarni rivojlantirish, madaniy-gumanitar hamkorlikni mustahkamlash, shuningdek, mamlakat yetakchi fan va ta’lim muassasalari o‘rtasidagi munosabatlarni kengaytirish masalalari muhokama qilingan.
Muzokaralar kun tartibidan to‘qimachilik va qishloq xo‘jaligi sohalarida hamkorlikni rivojlantirish masalalari ham o‘rin oldi. O‘zaro tovar ayirboshlash hajmini oshirish va qo‘shma loyihalarni amalga oshirishdan o‘zaro manfaatdorlik bildirilgan.
Turli darajada, jumladan, “Markaziy Osiyo – Yevropa Ittifoqi” shaklidagi bo‘lajak qo‘shma tadbirlar jadvali va tashkiliy jihatlariga alohida e’tibor qaratilgan.
Yanvar oxirlarida O‘zbekiston tashqi ishlar vaziri Baxtiyor Saidov Niderlandiyaning O‘zbekistondagi elchisi etib tayinlangan Niko Sxemersni qabul qilgandi. O‘shanda TIV rahbari elchining O‘zbekiston—Niderlandiya munosabatlarini boyitishga qaratilgan saʼy-harakatlarini qo‘llab-quvvatlashga tayyorligini bildirgan edi.
Izoh (0)