Samarqandning Kimyogarlar qo‘rg‘onidagi avtobus bekatlari talabga javob bermasligi ma’lum bo‘ldi
Kimyogarlar qo‘rg‘oni Samarqand shahri markazidan 9—10 kilometr uzoqlikda joylashgan. Ayni paytda ushbu hududda 25 mingdan ortiq aholi istiqomat qiladi, deb yozadi O‘zA.
“Transport qatnovida deyarli muammo uchramaydi. Bir necha yo‘nalishda avtobus, mikroavtobuslar qatnovi yo‘lga qo‘yilgan. Yo‘nalishsiz taksilar ham tunu kun yo‘lovchilar xizmatida. Ammo, Samarqand shahri va qo‘rg‘onni bog‘laydigan asosiy yo‘l – Narpay ko‘chasida ham, qo‘rg‘onning o‘zida ham birorta avtobus bekati yo‘q. Borlari ham foydalanishga yaroqsiz holga kelib qolgan. Hatto savdo va xizmat ko‘rsatish nuqtalariga aylanib ketgan bekatlar bor”, — deyiladi xabarda.
6, 15, 93-yo‘nalishlarda qatnovchi avtobus haydovchilarining aytishicha, Kimyogarlar qo‘rg‘onidan Samarqand shahrigacha 4—5 bekatda to‘xtab yo‘lovchi olish va tushirish belgilangan. Lekin belgilangan manzillarda bekatning o‘zi yo‘q. Shu sababli haydovchilar qayerda yo‘lovchi bo‘lsa, o‘sha yerda to‘xtashga majbur. Bu esa yo‘nalishlardagi qatnov tartibi va vaqtining buzilishiga sabab bo‘ladi.
“Qayerda bekat borligi yoki bo‘lishi kerakligi ham esimizdan chiqib ketgan. Qulay joydan Narpay ko‘chasiga chiqamiz yoki bozorcha oldiga borib turamiz. Yog‘in-sochinli kunlarda avtobus kutish uchun bekat yo‘qligidan taksi yoki mikroavtobusdan foydalanishga majbur bo‘lamiz. Biz-ku sharoitga qarab yo‘lga chiqaveramiz, lekin yomg‘ir yoki qor yoqqan paytlarda bolalar va keksalarning avtobus kutishi azob-da”, – deydi yo‘lovchi R.Hayitov.
