Bitkoin milliarderlari o‘z bitkoinlarini sotish shartlarini ma’lum qildi

Bitkoinlarining umumiy qiymati bir milliard dollardan ortiq bo‘lgan aka-uka Tayler va Kemeron Uinklvoss so‘nggi vaqtda bitkoin narxining keskin oshishiga qaramasdan, o‘zlarining kriptovalyuta zaxirasini sotmoqchi emasligini ma’lum qildi. Bu haqda New York Times xabar berdi.

Milliarderlarning ta’kidlashicha, ular bitkoinlar savdosi masalasini kriptovalyutaning umumiy qiymati butun dunyodagi oltin zaxirasi qiymatiga teng bo‘lganda ko‘rib chiqishga tayyor. Ayni vaqtda butun dunyodagi oltin zaxirasi qiymati taxminan sakkiz trillion dollar hisoblanadi, barcha bitkoinlarning ayni vaqtdagi qiymati esa 300 milliard dollardan ko‘proqni tashkil qiladi.

Shu tariqa Uinklvosslar bitkoinlarini bir birlik kriptovalyutaning qiymati 450 ming dollarga yetganda sotishi mumkin.

Aka-ukaning ma’lum qilishicha, ular bitkoin-hamyonning kalitlarini bir necha qismga bo‘lgan va ularni AQShning turli banklariga joylashtirgan. Shu tariqa bitkoinlar ehtimoliy o‘g‘rilikdan himoyalangan.