Eriyotgan muzliklar dunyoning qaysi shaharlarini suv ostida qoldiradi? NASA’ning virtual xaritasi

Amerikaning NASA kosmik agentligi olimlari muz qobig‘i global ko‘lamda erishi natijasida suv ostida qolishi mumkin bo‘lgan hududlarni oldindan aytib beruvchi va qaysi shaharlar eng katta xavf ostida bo‘lishini prognoz qiluvchi birinchi dasturni yaratdi, deb yozadi Hi-Tech Mail.Ru.

Dastur suv ostida qolishi mumkin bo‘lgan hududlar haqidagi ma’lumotlarni tahlil qilishda Yerning o‘z o‘qi atrofida aylanishi va gravitatsiyaviy ta’sirlar kabi omillarni hisobga oladi.

Yangi virtual vosita mamlakatlar va shaharlarga aynan qaysi muzliklar va muz qoplamalari ular uchun eng katta xavf tug‘dirishini tushunishga yordam beradi. Masalan, Londonni olsak, dengiz sathining ko‘tarilishi asosan Grenlandiyaning shimoli-g‘arbiy muzliklari maydonidagi o‘zgarishlarga bog‘liq.

Nyu-York uchun esa Grenlandiyaning shimoliy va sharqiy  hududlaridagi butun Grenlandiya muz qoplamasining holati xavfli hisoblanadi.

NASA dasturi mualliflaridan biri doktor Erik Larur ta’kidlashicha, dastur butun dunyo bo‘yicha dengiz sathidagi o‘zgarishlarni aniqlaydigan uchta muhim jarayonga taalluqli bo‘lgan ma’lumotlarni tahlil qiladi, bular:

• Gravitatsiyaviy ta’sirlar;
• Muzli hududlarda muzning quruqlik yuzasiga bosimi;
• Yer aylanadigan o‘qning tebranishi.