“Metallurg”ning so‘nggi ikki o‘yinida 90-daqiqadan keyin 2 tadan gol urildi. Bu tasodifmi?

O‘zbekiston Oliy Ligasi ishtirokchisi bo‘lgan Bekobodning “Metallurg” futbol klubi so‘nggi ikki turda 5 tadan gol urilgan o‘yinlarda ishtirok etdi. Birida Jizzaxning “So‘g‘diyona” klubiga 2:3 hisobida imkoniyat boy berilgan bo‘lsa, yana birida Toshkent viloyatining boshqa bir klubi “Olmaliq” taslim etildi.

Ijtimoiy tarmoqlarda bir qator sport jurnalistlari mazkur holatga shubha ko‘zi bilan qaraganini ko‘rish mumkin. Boisi, har ikki o‘yinda ham asosiy vaqt yakuniga yetib, qo‘shimcha daqiqalar boshlanganida 2 tadan gol urilgan.

25-tur

“So‘g‘diyona” — “Metallurg” 3:2

Gollar: Izzat Abdullayev, 37 (1:0). Ayubxon No‘monov, 46 (1:1). Sanjar Rashidov, 80 (2:1). Izzat Abdullayev, 93+ (3:1). Alisher Ziyovuddinov, 96+ (3:2).

26-tur

“Metallurg” — “Olmaliq” 3:2

Gollar: Muhammadodil Qahramonov, 37 (1:0). G‘ulomhaydar G‘ulomov, 40 (1:1). Islombek Isoqjonov, 80 (2:1). Sirojiddin Allayev, 92+ (3:1). Vladislav Kasminin, 93+ (3:2).Bekobodning “Metallurg” klubi kelishilgan o‘yinlarda ishtirok etgani yoki yo‘qligi borasida aniq ma’lumotlar yo‘q. “Obod”ning o‘yinlaridan shubhalangan Federbet xalqaro notijorat federatsiyasi bu borada O‘FFga maktub yo‘llagan yoki yo‘qligi ham aniq emas.

Toshkentning “Obod” futbol klubi O‘zbekiston Oliy Ligasi o‘yinlaridan chetlashtirildi

2017-yilgi mavsum 1-davrasida “Metallurg” o‘z maydonida “So‘g‘diyona”ni 3:1 hisobida taslim qilgan bo‘lsa, jamoaning “Olmaliq” maydonidagi bellashuvida imkoniyat boy berilgan — 0:1. O‘z navbatida “Olmaliq” va “So‘g‘diyona” klublarining o‘zaro to‘qnashuvlari ham o‘z uyida to‘p surayotgan tomonning 1 ta gol farqili g‘alabasi bilan yakuniga yetgan.

“Metallurg” va “Olamliq” klublarining o‘zaro o‘yinlardagi uy g‘alabalari Oliy Ligada ko‘p bor kuzatiladi. “Olmaliq” klubini salkam 10 yilga yaqin vaqt davomida boshqargan Igor Shkvirin ayni paytda Jizzaxning “So‘g‘diyona” jamoasida faoliyat olib boradi.