AQSHda 19-yanvardan TikTok’ni taqiqlash ko‘zda tutilgan qonun kuchga kirdi.
18-yanvar, shanba kuni AQSH Oliy sudi TikTok’ni sotishni yoki ilovani mamlakatda butunlay taqiqlashni talab qiluvchi qonunni ma’qullagandi. Bunday qaror milliy xavfsizlik va TikTok’ning Xitoy hukumati bilan taxminiy aloqalari bilan bog‘liq xavotirlar tufayli qabul qilindi.
AQSH TikTok yakshanbaga o‘tar kechasi ishlamay qoldi, uning ilovasi App Store’dan ham yo‘qoldi. Amerikalik foydalanuvchilar TikTok servisiga egalik qiluvchi Xitoyning ByteDance kompaniyasi bilan bog‘liq CapCut, Lemon8, Gauth va Hypic ilovalari ham ishlamay qolganini aytmoqda.
Donald Tramp prezident bo‘lishi bilanoq (yaʼni 20-yanvarda) TikTok’ni mamlakatda vaqtincha tiklashga yordam berishi mumkinligini bildirgan. AQSH prezidenti qonunning kuchga kirishini 90 kunga kechiktirish huquqiga ega. Tramp NBC News telekanaliga bergan intervyusida bu huquqidan foydalanish-foydalanmasligini hali hal qilmaganini aytgan. U shunday qaror qabul qilsa, bu haqda 20-yanvar, inauguratsiya kuni e’lon qilishini bildirgan.
The Washington Post’ning yozishicha, Tramp qonunni o‘zi bekor qila olmaydi. U yo Kongressni uni bekor qilishga ishontirishi, yoki bosh prokurorga go‘yoki bunday qonun yo‘qdek, uni amalga oshirmaslikni buyurishi kerak.
Izoh (0)