Bankrotlikdan so‘ng qayta tiklanib, 2010-yil oxirida bozorga qaytganidan buyon, AQShning General Motors giganti investorlar uchun ko‘p tomonlama stavkaga aylandi, deb yozadi Insider Pro.
Bir tomondan, GM’ning daromadi va rentabelligi oshdi, dividendlari esa pand bermadi. Boshqa tomondan esa — bu yuqori texnologiyali kompaniyalar rivojlanishi tufayli, risk zonasida bo‘lgan ancha eski korporatsiya.
Shubhasiz, GM — dunyodagi eng yirik avtomobil ishlab chiqaruvchilaridan biri. Ommaboplik reytingida ushbu brend AQShda birinchi, Xitoyda ikkinchi o‘rinni egallaydi. GM avtomobillari Lotin Amerikasi, Avstraliya va dunyoning boshqa qismlarida ham yaxshi sotiladi.
Bankrotlik, davlatdan moliyaviy ko‘mak va kompaniyaning bankrotlikdan keyingi reanimatsiyasi GM moliyaviy siyosatini tartibga solish imkonini berdi. Buning sharofati bilan u yanaqa raqobatbardoshroq bo‘ldi va Toyota, Volkswagen va Ford kabi markalarni ortda qoldirdi.
So‘nggi vaqtlarda GM aksiyalarining o‘sishiga nima sababchi bo‘lmoqda? Meri Barra rahbarligidagi top-menejment boshqaruvi ostida GM elektromobillar ishlab chiqarish, haydovchisiz texnologiyalar va avtomobillarni birgalikda ijaraga olish xizmatlarini rivojlantirish bo‘yicha yetakchilikka chiqmoqda. Shu tariqa esa kompaniya yangi texnologiyalarga moslashishga ulgurmayotgan avtomobil ishlab chiqaruvchilariga putur yetkazishi mumkin bo‘lgan ehtimoliy risklarni o‘zidan uzoqlashtirmoqda.
Nashr GM kompaniyasining boshqa “plyus” jihatlarini ham sanab o‘tdi:
- GM daromadi o‘smoqda, va bu tendensiya yaqin kelajakda davom etadi;
- GM “kapitalni taqsimlashning oqilona tuzilmasi” tamoyillariga rioya qiladi, uning doirasida investitsiya qilingan kapitalning kutilayotgan daromadliligi 20 foizdan oshadi;
- GM navbatdagi iqtisodiy inqirozga puxta tayyorgarlik ko‘rib qo‘ygan;
- GM yoqimsiz “syurpriz”larga duch kelmaslik va oldindan moslashib olish uchun asos tayyorlab qo‘ygan.
Izoh (0)