O‘zbekiston milliy terma jamoasi JCh—2018 saralashidagi so‘nggi o‘yinda Janubiy Koreya bilan 0:0 hisobida durang o‘ynadi. Suriya terma jamoasi esa safarda Eron bilan 2:2 hisobida durang o‘ynadi.
Shunday qilib, O‘zbekiston milliy terma jamoasi JCh—2018 yo‘llanmasi uchun kurashdan chiqdi. Eron va Janubiy Koreya termalari JCh—2018 ga to‘g‘ridan-to‘g‘ri yo‘llanmani qo‘lga kiritdi. Suriya termasi esa pley-off bosqichida mundial uchun kurashni davom ettiradi.
O‘zbekiston milliy terma jamoasi JCh—2018 chiptasini qo‘lga kiritishi uchun koreyaliklarni istalgan hisobda taslim etsa yetarli edi. Buning uchun forslar ikki bor imkon yaratib berdi. Birinchidan, Samvel Babayan jamoasi Xitoydan mag‘lub bo‘lganida Karlush Keyrush jamoasi Janubiy Koreyadan ochko olib berdi, O‘zbekiston Koreyani taslim qila olmagan kuni esa eronliklar Suriya bilan durang o‘ynab berdi.
O‘zbekiston milliy terma jamoasiga bunga qadar Koreyani yutib bergani holda Qatar va Xitoy termalari ham yordam bergandi. Biroq Samvel Babayan hech bir imkoniyatdan foydalana olmadi va hatto pley-off yo‘llanmasini ham qo‘lga kirita olmadi.
Shu tariqa o‘z maydonlarida hatto mashg‘ulot o‘tkaza olmaydigan, uy uchrashuvlarini Malayziyada o‘tkazishga mahkum bo‘lgan, futbolchilari kuchli chempionatlarda to‘p surmaydigan Suriya O‘zbekistondan yaxshiroq natija qayd etdi. Shu tariqa ular JCh—2018 uchun umidni saqlab qoldi. Terma jamoalar markazi xodimlari unga haykal qo‘yishni rejalashtirgan Samvel Babayan boshqargan jamoa esa Rossiya mundialini ham qo‘ldan boy berdi.
JCh—2018. Saralash “A” guruhi. 10-tur 5-sentabr, seshanba
O‘zbekiston — Janubiy Koreya 0:0
Eron — Suriya 2:2
Gollar: Muhammad Tamer, 13 (0:1). Sardor Azmun, 45 (1:1). Sardor Azmun, 64 (2:1). Umar As-Somah, 93+ (2:2).Qatar — Xitoy 1:2
Gollar: Akrom Afif, 47 (1:0). Zi Xiao, 74 (1:1). Vu Lei, 83 (1:2).Chetlatish: Zi Xeng, 80 (X).
Izoh (0)