O‘zbekiston Xalq ta’limi, Oliy va o‘rta maxsus ta’lim, Iqtisodiyot va Moliya vazirliklarining takliflariga muvofiq Xalq ta’limi vazirligi tarkibida Toshkent viloyati Chirchiq davlat pedagogika instituti tashkil etiladi. Prezident 27-iyul kuni bu haqdagi qarorni imzoladi, deb xabar beradi Uz24.
Hujjatda Chirchiq davlat pedagogika institutining asosiy vazifalari belgilab berilgan.
Ta’lim muassasalariga o‘qishga qabul kilish bo‘yicha davlat komissiyasi 2017–2018-o‘quv yili uchun Chirchiq davlat pedagogika institutining talabalari kontingentini Toshkent viloyatida doimiy yashayotgan Toshkent davlat pedagogika universiteti va boshqa turdosh oliy ta’lim muassasalariga hujjat topshirib, mazkur ta’lim muassasalariga belgilangan to‘lov-kontrakt kvotalari doirasida o‘qishga qabul qilinmagan mos va turdosh ta’lim yo‘nalishlari abituriyentlari hisobidan Toshkent viloyati tumanlari ta’lim muassasalari ehtiyojlarini inobatga olgan holda shakllantiradi.
Chirchiq davlat pedagogika institutiga 2017–2018-o‘quv yili uchun talabalar o‘qishga amaldagi bazaviy to‘lov-kontrakt miqdori bo‘yicha tasdiqlangan kvota doirasida qabul qilinadi.
Fan va texnologiyalar agentligi Xalq ta’limi vazirligining taklifiga asoslanib Chirchiq davlat pedagogika instituti uchun tayanch oliy ta’lim muassasalariga doktoranturaga 2018-yil uchun maqsadli kvotalar ajratadi.
Xalq ta’limi vazirligi 2017-yil 1-sentabrgacha Chirchiq davlat pedagogika instituti yo‘riqnomasini tasdiqlab, o‘rnatilgan tartibda davlat ro‘yxatidan o‘tkazishi lozim.
Izoh (0)