Президент солиқ тизимини ислоҳ қилиш бўйича эксперт комиссиясини тузди

Шавкат Мирзиёевнинг 20 июлдаги фармойишига мувофиқ, республика солиқ тизимини такомиллаштириш бўйича доимий ишлайдиган эксперт комиссияси тузилди, деб ёзади «Газета.uz».

Бир ойда камида бир марта мажлис ўтказадиган комиссиянинг асосий вазифалари сифатида солиққа тортиш халқаро амалиётини ўрганиш ҳамда «республика солиқ тизимини дунёнинг ривожланган мамлакатларида қабул қилинган, хорижий инвесторлар учун тушунарли бўлган ва уларни Ўзбекистон иқтисодиётига инвестиция киритишга рағбатлантирадиган солиқ тизимига мувофиқлаштириш» бўйича таклифларни ишлаб чиқиш белгиланди.

Комиссия солиқ юкламасининг шаклланган даражасининг хўжалик субъектлари фаолиятининг самарадорлиги кўрсаткичларига, корхоналарнинг молиявий барқарорлигига, иқтисодиётдаги ўзаро ҳисоб-китоблар ҳолатига, дебиторлик ва кредиторлик қарзлари динамикасига таъсирини ўрганиш ва тегишли таклифларни тайёрлаш билан шуғулланади.

У, шунингдек, ҳудудларнинг солиқ салоҳиятини ўрганиш, барча даражалардаги бюджетларнинг даромад базасини мустаҳкамлаш, молия ва солиқ органлари ҳамда маҳаллий ҳукумат органларининг солиққа тортиладиган базани кенгайтириш ва солиқ тўпланувчанлигини оширишдан манфаатдорликларини кучайтириш бўйича услубий масалаларни ишлаб чиқади.

Эксперт комиссиясига вазирликлар, идоралар, хўжалик бирлашмалари ва ташкилотлар мутахассисларини, шунингдек, мустақил экспертларни (шу жумладан чет элдан) ишга жалб этиш ҳуқуқи берилди.