IUT bitiruvchilaridan 3 nafari Janubiy Koreyada magistr darajasini olishi mumkin

Toshkent shahridagi Inha universiteti (IUT)ning uch nafar bitiruvchisi Janubiy Koreyadagi Inha universiteti magistraturasida ta’lim olish imkoniyatini qo‘lga kiritadi. Bu haqda IUT matbuot xizmati xabar bermoqda. 

IUT rektori Sarvar Boboxo‘jayev Janubiy Koreyadagi Inha universiteti rahbariyati bilan muzokaralari davomida IUT bitiruvchilari universitetda ta’lim olishi uchun imkoniyat yaratish to‘g‘risida kelishib oldi.

Kelishuvga muvofiq, 2019—2020-akademik yildan boshlab IUT’ni bakalavriat dasturi bo‘yicha tamomlagan 3 nafar talaba Janubiy Koreyadagi Inha universiteti magistraturasida ta’lim olish imkoniyatini qo‘lga kiritadi. 

Janubiy Koreyadagi magistraturada ta’lim olish uchun talabalarga Toshkent shahridagi Inha universiteti ma’muriyati tavsiyanoma beradi. Talabalar magistrlik darajasini olib qaytgach, IUT’ga ishga qabul qilinadi.

Ma’lumot uchun, hozirda “Kompyuter va dasturiy injiniring” fakultetining 4-bosqichidagi 99 nafar talaba Janubiy Koreyadagi Inha universitetida tahsil olmoqda. Ular universitetda ikki semestr davomida – 2017-yilning dekabr oyiga qadar bo‘ladi.