Aktrisa Zarina Nizomiddinova erta oila qurgani borasida afsuslanishini aytdi. Bu haqda u “Darakchi.uz” nashriga bergan intervyusida ma’lum qildi.
“Ijodimni erta boshlab, bugungi kundagi muvaffaqiyatlarimni boshdan o‘tkazayotganimga hech afsuslanmayman. San’at bilan shug‘ullanib yomonlik ko‘rmadim. Oila qurish borasida esa afsuslar yo‘q emas. O‘shanda, 18 yashar qiz edim. Hayotiy tajribalarsiz, faqat his-tuyg‘ularga tayangan ekanman. Agar bugungi kundagi aqlim bilan oila qurganimda, birinchi turmushimdan ajrashmagan bo‘lardim, deb o‘ylayman. Lekin, ming shukr, farzandim yonimda. O‘zim bilan xuddi opa-ukadek ulg‘ayapti. Meni tanimaganlar ona ekanimni bilmaganlar, shunday katta bolam borligini ko‘rib, havas qilishadi. Shu baxtim hayotimdagi boshqa kamchilik va afsuslarni yuvib ketadi.
O‘g‘li haqida gapirar ekan: “U bugun ikkinchi sinf, lekin katta odamlardek suhbatda bo‘lamiz. Misol uchun dadasi chet elda, bir-birimizga to‘g‘ri kelmaganimiz uchun ajrashganimizni, hatto munosabatlarimiz yaxshi emasligini ham tushuntirib berganman. Ko‘chada men haqimda yolg‘on gaplarni eshitib siqilgandan ko‘ra, o‘zimdan bor gapni bilgani yaxshiroq, nazarimda”, — dedi.
“Nima bo‘lganda ham u bola. Dadasi haqida gapirganingizda ko‘ngli sinishidan cho‘chimaysizmi?” — degan savolga aktrisa quyidagicha javob berdi: “Sobiq turmush o‘rtog‘im bilan ajrashganimizdan so‘ng qayta yarashishga ko‘p urindi. Uyimizga kelib kechirim so‘ragan paytlari ham bo‘lgandi. O‘sha paytlarda bolam, deb mehr ko‘rsatganini eslolmayman. Ona uchun bolasiga nisbatan bunday beparvolik og‘ir botadi. Aytmoqchimanki, o‘g‘lim Temirxon bo‘lib o‘tgan voqealardan keyin dadasini qo‘msashi yoki sog‘inishi qiyin”.
Izoh (0)