O‘zbekiston xalq yozuvchisi Erkin A’zam: So‘nggi kitobimni 25 ming so‘mga o‘zim ham sotib olmagan bo‘lardim. Qimmat!

O‘zbekiston xalq yozuvchisi Erkin A’zam mamlakatda kitobxonlik madaniyatini yuksaltirish uchun kitob nashri va savdosi sohasida mavjud muammolarni hal qilish lozim, deb hisoblaydi. Bu haqda u “Pravda Vostoka” gazetasiga bergan intervyusida aytib o‘tdi.

Erkin A’zamning fikricha, O‘zbekiston Prezidenti Shavkat Mirziyoyevning 12-yanvardagi “Kitob mahsulotlarini chop etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targ‘ibot qilish bo‘yicha komissiya tuzish to‘g‘risida”gi farmoyishi mamlakatda kitobga bo‘lgan hurmatni qaytarish yo‘lidagi muhim qadamdir.

Qachonlardir biz jahondagi eng ko‘p o‘qiydigan xalqlardan biri edik. Kitob yagona yupanch edi. Kitobni, qanday yo‘l bilan bo‘lmasin — makulaturaga almashtirib, so‘rab-surishtirib, safarlardan qaytishda qo‘lga kiritishga urinardik.

Bozor munosabatlarining kirib kelishi bilan kitobsiz ham yashash mumkinligi haqidagi fikr, turmush tarzi shakllanib qoldi. Moddiyat ma’naviy ehtiyojlardan ustun keldi. Bularning bari bizni ortga siljitdi. Shu sababli ham, Prezidentning farmoyishi — bu kitobga bo‘lgan hurmatni qaytarish yo‘lidagi eng muhim qadamlardan biridir.

Kitobxonlarning yangi avlodini tarbiyalash uchun oilaviy kitob o‘qish an’analarini va OAVda kitobxonlik madaniyatini rivojlantirishga qaratilgan siyosatni shakllantirishga e’tibor qaratmoq zarur. Haqiqiy adabiyot qayerda-yu, omma adabiyoti qayda — tushuntirib, ko‘rsatib berish kerak.

Kitob nashri va savdosi sohasida ham muammolar oz emas. Kitob hamyonbop bo‘lishi kerak. Masalan, mening so‘nggi kitobim tannarxi 17 ming so‘m, “Kitob olami” esa uni 25,5 ming so‘mdan sotmoqda. Qimmat-ku! Kim sotib oladi uni? Men o‘zim ham sotib olmagan bo‘lardim.

Bu mening fikrim, chunki men kitob yozaman. Davlat rahbarining farmoyishini men o‘z ko‘chamdagi bayramdek qabul qilaman.

Erkin A’zam, O‘zbekiston xalq yozuvchisi