22-may kuni Manchesterdagi konsertida terakt sodir etilgan amerikalik qo‘shiqchi Ariana Grande 4-iyun, yakshanba kuni shu shaharda yana sahnaga chiqib, jabrlangan tomoshabinlarga yordam ko‘rsatish maqsadida tashkil qilingan xayriya tadbirida ishtirok etdi, deb yozadi “TASS”.
Mashhur Emirates Old Trafford stadionidagi One Love Manchester nomli shouga 50 ming tomoshabin tashrif buyurdi.
Bir kun avval Manchester kasalxonalariga borgan 23 yoshli qo‘shiqchi ommaga yuzlanib, uning xudkush terrorchi hujumidan jabrlangan muxlislariga ko‘mak berish g‘oyasini qo‘llab-quvvatlashgani uchun minnatdorlik bildirdi. Ba’zi qo‘shiqlarini u konsertga kelgan boshqa xonandalar — Mayli Sayrus, Black Eyed Peas guruhi, Robbi Uilyams, Keti Perri, Jastin Biber va boshqalar bilan jo‘rlikda ijro etdi.
Chiptalari olti daqiqa ichida sotilib ketgan konsert politsiya va xavfsizlik kuchlarining qattiq nazorati ostida bo‘lib o‘tdi. Ushbu shoudan tushgan mablag‘ shahar kengashi va Qizil Xochning Britaniya bo‘linmasi tomonidan yaratilgan We Love Manchester fondiga o‘tkaziladi.
Izoh (0)