AlphaGo dasturi eng kuchli go o‘yinchisini mag‘lub etdi. Dasturchilar bu AlphaGo’ning so‘nggi o‘yini bo‘lganini ma’lum qildi

AlphaGo dasturi 27-may kuni go o‘yini bo‘yicha eng kuchli o‘yinchi — Ke Szeni Xitoyda o‘tgan musobaqaning so‘nggi — uchinchi partiyasida mag‘lub etdi. Meduza’ning xabar berishicha, dastlabki ikki partiya ham AlphaGo foydasiga hal bo‘lgan edi.

“Sinxua” agentligi xabariga ko‘ra, Sze uch yarim soat davom etgan qarama-qarshilikdan so‘ng taslim bo‘lgan.

“Men sovuq, xotirjam va dahshatli raqibga duch keldim. Men AlphaGo’ning faqat yarim harakatlarini oldindan to‘g‘ri taxmin qila oldim, xolos”, — deya o‘yinchining so‘zlaridan iqtibos keltirmoqda agentlik.

Insonni yenggan dasturni ishlab chiqqan DeepMind kompaniyasi dasturchilarining ma’lum qilishicha, bu AlphaGo’ning so‘nggi o‘yini bo‘lgan (mazkur kompaniya Alphabet korporatsiyasiga tegishli). The Verge’ning yozishicha, kompaniya go o‘yinchilari o‘rganishi uchun dastur o‘zi bilan o‘zi o‘ynagan 50 o‘yin haqidagi ma’lumotni chop etadi.

“AlphaGo katta ehtimol bilan [inson uchun] raqib emasdi, uning vazifasi — o‘yinchilarni uch ming yillik tarixga ega o‘yinda yangi strategiyalar va yangi g‘oyalarni o‘ylab topishga ilhomlantirish edi”, — dedi DeepMind kompaniyasining asoschilaridan biri Demis Xassabis.

“AlphaGo’ni ishlab chiqqan tadqiqotchilar jamoasi endi o‘z kuch-g‘ayratini boshqa katta vazifalarni hal qilishga, vaqti kelib olimlar oldidagi eng murakkab vazifalar — yangi dori-darmonlarni ishlab chiqish, energiya iste’molini kamaytirish yoki yangi inqilobiy materiallarni o‘ylab topish kabilarni hal qilishga yordam beradigan ilg‘or umumiy algoritmlarni ishlab chiqishga yo‘naltiradi”, — deyiladi DeepMind kompaniyasi bayonotida.

AlphaGo — professional go o‘yinchisini mag‘lub etishga qodir ilk kompyuter dasturidir. Bungacha go o‘yinida insonni bilan raqobatlasha oladigan sun’iy idrokni ishlab chiqish uchun bir necha o‘n yillar kerak bo‘ladi, deb taxmin qilinardi.

2016-yilning bahorida dastur ko‘rgazmali o‘yin vaqtida go grossmeysteri Li Sedolni mag‘lub etgan edi. Dasturga uning so‘nggi uchta o‘yinida raqiblik qilgan 19 yoshli Ke Sze esa go o‘yinchilarining jahon reytingida birinchi o‘rinda turadi.