Hindistonda 14 kilometrli bo‘yinbog‘ to‘qilib, Ginnes rekordi o‘rnatildi

Hindistondagi Mother of India Crochet Queens to‘qish ishqibozlari klubi 14,09 kilometrli bo‘yinbog‘ tayyorladi va Ginnes rekordlar kitobiga kirdi. Bu haqda Times of India ma’lum qildi.

Gigant bo‘yinbog‘ ustida Hindiston, Dubay, Gonkong, Singapur va Polsha fuqarolari bo‘lgan 700 dan ortiq ayol fevral oyidan beri ishladi.

Guinness World Records hakami Rishi Natxga ko‘ra, bu shunday yo‘nalishdagi birinchi rekord. Uni o‘rnatish uchun bir kilometrdan oshiq bo‘yinbog‘ni to‘qish yetarli bo‘lardi.

Tinchlik uchun kurash g‘oyasini o‘z oldiga maqsad qilib qo‘ygan klub ishtirokchilari tayyorlagan mahsulotlarini Rossiya, AQSh, Buyuk Britaniya, Fransiya, Germaniya, Yaponiya va Xitoy yetakchilari, shuningdek, BMT bosh kotibi va nufuzli vakillariga yuborish niyatida.