2017-yilning 14—17-may kunlari O‘zbekiston Respublikasi Mehnat vazirligi huzuridagi Tashqi mehnat migratsiyasi masalalari agentligi mas’ul xodimlari va O‘zbekistonning Moskvadagi elchixonasi diplomatlaridan iborat tarkibdagi o‘zbek delegatsiyasi Rossiya Federatsiyasining Rostov viloyatiga tashrif buyurdi. Bu haqda Tashqi mehnat migratsiyasi masalalari agentligi matbuot xizmati “Daryo”ga ma’lum qildi.
14-may kuni “Mehnat migratsiyasi sohasida O‘zbekiston—Rossiya hamkorligining asosiy yo‘nalishlari to‘g‘risida” mavzusida taqdimot o‘tkazildi. Unda Rostov viloyati yetakchi kompaniyalari vakillari, shuningdek, qurilish, qishloq xo‘jaligi sohasidagi yirik ish beruvchilar, kadrlar sohasidagi agentliklar va sug‘urta kompaniyalari rahbarlari ishtirok etdi.
Tadbir ishtirokchilari agentlik faoliyati bilan tanishtirildi va ularga mamlakatning kadrlar sohasidagi yuqori salohiyati, shuningdek, Rossiya Federatsiyasi bilan mehnat migratsiyasi sohasidagi hamkorlikni kengaytirish bo‘yicha ko‘rilayotgan choralar to‘g‘risida ma’lumotlar taqdim etildi.
15-may kuni delegatsiya migratsiya bilan bog‘liq vaziyatni joylarda o‘rganish maqsadida chet ellik fuqarolarni vaqtinchalik ushlab turish maxsus muassasasiga tashrif buyurdi. Shu kuning o‘zida agentlik va O‘zbekiston Respublikasi elchixonasi vakillarining Donskoy davlat texnika universitetiga tashrifi tashkil etildi. U yerda Rostov viloyati OTMlarida ta’lim olayotgan o‘zbekistonlik talabalar bilan suhbat tashkil etildi.
16-may kuni “Don plaza” kongress-mehmonxonasi binosida agentlik va O‘zbekiston Respublikasi elchixonasi vakillarining Rostov viloyati ma’muriyati, jumladan, TIV, Iqtisodiy taraqqiyot vazirligi, bandlik xizmati boshqarmasi, Mehnat va ijtimoiy taraqqiyot vazirligining mehnat bo‘yicha boshqarmasi, shuningdek Don quruvchilar assotsiatsiyasi vakillarining uchrashuvi tashkil etildi.
Agentlik delegatsiyasining “Rostov porti” davlat kompaniyasiga tashrifi amalga oshirildi.
Izoh (0)