Microsoft yangi Windows’da standart brauzerni almashtirishni taqiqladi

Yangi Windows 10 S operatsion tizimida boshidan o‘rnatilgan brauzerni almashtirishning imkoniyati bo‘lmaydi. Bu haqda “RBK” xabar bermoqda.

Foydalanuvchi Windows Store rasmiy onlayn do‘konidan boshqa brauzer ko‘chirib, o‘rnatishi mumkin bo‘ladi, ammo ko‘chirilgan fayllar va havolalar faqat standart sifatida belgilangan Microsoft Edge’da ochiladi.

Bundan tashqari, o‘rnatilgan qidiruv tizimini o‘zgartirib bo‘lmaydi. Edge va Internet Explorer uchun standart qidiruv tizimi esa Bing bo‘ladi. Dasturlar do‘konida boshqa qidiruv tizimlari taqdim etilmagan.

Microsoft Windows operatsion tizimining yangi versiyasini 2-may kuni taqdim etdi. Windows 10 S — Windows 10 ning yengillashtirilgan versiyasi bo‘lib, asosan maktab o‘quvchilari va talabalarga mo‘ljallangan.