O‘zbekiston Respublikasi Prezidenti Shavkat Mirziyoyev “Prokuratura organlarining ijtimoiy-iqtisodiy islohotlar va mamlakatni modernizatsiya qilish, inson huquq va erkinliklar ishonchli himoya qilinishini ta’minlashdagi rolini kuchaytirish to‘g‘risida”gi Farmonni imzoladi. Bu haqda “Gazeta.uz” xabar bermoqda.
Farmonda prokuratura organlarining asosiy vazifasi sifatida xalq manfaatlari uchun xizmat qilish belgilandi. Bunda quyidagi yo‘nalishlardagi vazifalar ta’minlanishiga alohida e’tibor qaratilishi ko‘zda tutilgan:
- Hududlarni kompleks rivojlantirish dasturlari so‘zsiz bajarilishi, islohotlarni amalga oshirishga xalaqit berayotgan tizimli nuqsonlarni aniqlash va bartaraf etish;
- Tadbirkorlik faoliyatini har tomonlama qo‘llab-quvvatlash, tadbirkorlik subyektlari huquq va manfaatlarini ishonchli himoyalash;
- Aholi bilan to‘g‘ridan to‘g‘ri va ochiq muloqot o‘rnatilishi, fuqarolar murojaatlari o‘z vaqtida ko‘rib chiqilishi va hal etilishi;
- Profilaktik tadbirlarning, xususan, voyaga yetmaganlar va yoshlar o‘rtasidagi samaradorligi, huquqbuzarliklar sodir etilishi sabablarini aniqlash va barataraf etish;
- Kam ta’minlangan oilalarni manzilli ijtimoiy himoya qilish, yangi ish o‘rinlari yaratish dasturlarining amalga oshirilishi, ish haqi, pensiya, stipendiya va nafaqalar o‘z vaqtida to‘lanishi;
- Malakali tibbiy yordam ko‘rsatilishi, dori-darmon vositalarining aholi uchun maqbulligi, ta’lim jarayoni sifati, ta’lim muassasalaridagi davomat;
- Fuqarolar, birinchi galda yosh oilalar va yetim bolalarni arzon uy-joy, uy olish kredit resurslari bilan ta’minlash, kommunal xizmatlar ko‘rsatish sifati va hisob-kitoblarning o‘z vaqtida amalga oshirilishi;
- Tabiiy resurslar, yer maydonlaridan maqsadli va samarali foydalanish.
Bosh prokuratura tarkibida Ijtimoiy sohada qonunchilik bajarilishi ustidan nazorat va Iqtisodiy sohada qonunchilik bajarilishi ustidan nazorat boshqarmalari tashkil etildi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)