O‘g‘irliklardan bezor bo‘lgan avstraliyalik tadbirkor do‘koniga qora tanli o‘smirlar kirishini taqiqladi

Melburn (Avstraliya) yaqinidagi Melton shaharchasida joylashgan oziq-ovqat mahsulotlari do‘koni egasi Lunji Lin eshikka 14 dan 18 yoshgacha bo‘lgan qora tanli o‘smirlar va itlar kirishi man etilishini anglatuvchi bildiruv yopishtirishga majbur bo‘ldi. Bu haqda TJournal xabar bermoqda.

Tadbirkor bir necha yigitchalar uning ko‘z oldida va kuzatuv kameralaridan hayiqmay peshtaxtalardan mahsulot o‘g‘irlaganidan so‘ng shunday qarorga keldi. Lunji Lin talonchilarni to‘xtatishga harakat qildi, biroq bu umuman naf bermadi.

“Bunday hodisa ikki oy mobaynida yigirmanchi marotaba sodir bo‘ldi. Ularni to‘xtatishga urinsam, mushtlashishga chorlab, mazax qilishdi. Politsiyaga qo‘ng‘iroq qilish foydasiz, ularning qo‘lidan hech narsa kelmaydi. To‘g‘risi, jonimga tegib ketdi”, — deydi hafsalasi pir bo‘lganini yashirmagan Lunji Lin.

Do‘kon egasi bir necha soatdan so‘ng hovuridan tushib, oynadagi bildiruvni olib tashladi. Biroq uni kimdir suratga tushirib, ijtimoiy tarmoqqa joylashtirishga ulgurdi.

“Daryo”ning Telegram’dagi rasmiy kanali — @toshqindaryo’ga a’zo bo‘ling!