Profilaktika kunida Toshkentning Yakkasaroy tumanidagi 135-umumta’lim maktabida “Davomat” tadbiri o‘tkazildi, deb yozadi O‘zA.
Maktabning bir sinfiga kirgan tuman ichki ishlar boshqarmasi xodimlari o‘quvchilarning bilaklarini tekshirib ko‘rdi. Ikki o‘quvchining bilagida o‘tkir buyum bilan kesib chizilgan baliqning rasmi borligi aniqlandi.
Ushbu holat yuzasidan o‘tkazilgan surishtiruv davomida ushbu o‘quvchilar internet tarmog‘ida “Ko‘k kit” nomi bilan tarqalgan o‘yinning videoroligini ko‘rib, bilaklariga kitning suratini chizganliklari ma’lum bo‘ldi. O‘quvchilarning ota-onalari esa bundan mutlaqo bexabar ekanligi aniqlandi. Ayanchli hodisa qanday oqibatga olib borishi nafaqat o‘quvchilar, balki ota-onalariga chuqur tushuntirildi.
Navbatdagi profilaktika kunida Yakkasaroy tumanidagi internet klublar, ularga kimlar tashrif buyurayotgani va nimalar bilan mashg‘ulligi tekshirildi. Bobur ko‘chasidagi uyda joylashgan kompyuterxonaning nim qorong‘u xonasida yigirmatadan ko‘proq kompyuter bo‘lib, ularning har birida turli yoshdagi yigitlar turfa o‘yinlar bilan mashg‘ul ekanligi aniqlandi.
Profilaktika kunida Yakkasaroy tumanining ayrim mahallalarida notinch oilalar vakillari bilan suhbatlar olib borilgan bo‘lsa, ba’zi mahallalarda sayyor sud majlislari tashkil etildi. Qo‘riqlash, yong‘in xavfsizligi, yo‘l harakati qoidalari bilan bog‘liq profilaktik tadbirlar ham o‘tkazildi.
Toshkent shahar Ichki ishlar bosh boshqarmasida profilaktika kuni munosabati bilan o‘tkazilgan brifingda o‘tgan bir hafta davomida o‘ttizdan ortiq jinoyat fosh etilgani va qidiruvda bo‘lgan 45 nafar shaxs ushlangani ma’lum qilindi. “Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)