O‘zbekistonda yangi bank — “O‘zagroeksportbank” aksiyadorlik-tijorat banki tashkil etiladi. Bu haqda O‘zbekiston Prezidenti Shavkat Mirziyoyevning 2017-yil 24-yanvardagi qarorida ko‘rsatib o‘tilgan, deya xabar beradi “Gazeta.uz”.
Bank tashkil etilishidan maqsad eksport qiluvchi tashkilotlarni moliyaviy qo‘llab-quvvatlash, meva-sabzavot mahsulotlari eksporti imkoniyatlarini samarali va barqaror rivojlantirishni ta’minlash, agrosanoat mahsulotlari ishlab chiqaruvchilar va aholi uchun yanada qulay shart-sharoitlar yaratishdan iborat.
O‘zbekiston tiklanish va taraqqiyot jamg‘armasi (7,5 million yevro, 75 foiz), “O‘zbekinvest” (1 million yevro, 10 foiz), “O‘zbekoziqovqatxolding”, “O‘zagrosug‘urta” va “Kafolat” (500 ming yevrodan yoki 5 foizdan) boshlang‘ich ustav kapitali 10 million yevro bo‘lgan bankning muassislari hisoblanadi.
2020-yilga qadar “O‘zagroeksportbank” 15 foizdan kam bo‘lmagan ulush bilan strategik xorijiy investorlarni ustav kapitaliga jalb etishi lozim.
Yangi bank va uning filiallari ro‘yxatga olingan sanadan boshlab 5 yil muddatga barcha turdagi soliqlar hamda davlat maqsadli jamg‘armalariga majburiy ajratmalar to‘lashdan ozod qilinadi. Bo‘shayotgan mablag‘ bankning resurs va moddiy-texnika bazasini mustahkamlashga maqsadli yo‘naltiriladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)