Berdaq nomidagi qoraqalpoq davlat musiqali teatrida o‘zbek kino san’ati ustalari tomonidan yaratilgan “Ustyurtga yo‘l” nomli badiiy film taqdimoti bo‘lib o‘tdi, deb xabar beradi O‘zA.
Surg‘il koni negizida barpo etilgan Ustyurt gaz-kimyo majmuasi haqida o‘zbek kinematografchilari tomonidan yaratilgan ushbu filmni tomoshabinlar samimiy kutib oldi. Tadbirda ijodiy va ilmiy sohalar ziyolilari, neft va gaz tarmog‘i mutaxassislari, talaba-yoshlar ishtirok etdi.
“O‘zbekkino” milliy agentligi, “Qoraqalpoqfilm” studiyasi, “O‘zbekneftgaz” milliy xolding kompaniyasi va boshqa qator tashkilotlar hamkorligida suratga olingan “Ustyurtga yo‘l” badiiy filmi adiblar Guliston Annaqlicheva va Abduqayum Yo‘ldoshev ssenariysi asosida rejissor, Qoraqalpog‘istonda xizmat ko‘rsatgan madaniyat xodimi Abduvohid G‘aniyev tomonidan suratga olingan.
Film Surg‘il koni negizida Ustyurt gaz-kimyo majmuasining yaratilish tarixi, ulkan loyiha va uning amalga oshirilishi, bu yerda mehnat qilayotgan yosh mutaxassislar faoliyati haqida hikoya qiladi.
Kinokartinada Minajiddin Uzoqboyev, Akbarxo‘ja Rasulov, Adiz Rajabov, Nargiza Salomonova, Shahzoda Matchonova, Ko‘pjursin Allanazarov, Abduraim Abduvahobov kabi aktyorlar talqinida gavdalangan qahramonlar timsolida qurilishda amalga oshirilgan bunyodkorlik ishlari aks ettirilgan.
Taqdimot marosimida “Asr qurilishi” nomli hujjatli film ham namoyish etildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)