Do‘stlar yoki qarindoshlarimizning to‘yiga yo‘l olar ekanmiz, har doimgidek, nima sovg‘a qilsam ekan, degan savol paydo bo‘ladi. Sovg‘a foydali va yodda qolarli, yaqinlarimizda ajoyib taassurot uyg‘otishini istaymiz. Shuni unutmaslik lozimki, kelin-kuyov uchun sovg‘aning qiymati emas, e’tiboringiz birinchi o‘rinda turadi.
Agar yoshlar oilaviy hayotini noldan boshlayotgan bo‘lsa, har qanday maishiy texnika, mebel yoki interyer buyumi ularga asqotadi.
Barcha davrlarda yoshlarga to‘y sovg‘asi sifatida idishlar hadya qilingan. Yosh oila uchun zanglamaydigan po‘latdan ishlangan kastryulkalar to‘plami, keramik qoplamli idishlar to‘plami, stol anjomlari to‘plami, shuningdek, chinni yoki issiqqa chidamli oynadan ishlangan stol servizini xarid qilish mumkin.
Zamonaviy maishiy texnika an’anaviy idishlarni biroz chetga chiqardi. Bugun to‘ylarda oshxona kombayni, mikser, dazmol, qahva tayyorlaydigan mashina va boshqalar ko‘plab sovg‘a qilinmoqda.
Pul — zamonaviy to‘ylardagi eng ommabop sovg‘a. Pul shaklidagi sovg‘aning sira yomon tomoni yo‘q. Bu holatda yoshlar o‘zi uchun eng kerakli narsani xarid qilishi mumkin. Agar pul hadya qilish bilan birga esda qolarli sovg‘a qilishni istasangiz, maishiy texnika supermarketi, mebellar saloni yoki zargarlik do‘konining sovg‘a sertifikatini xarid qilishingiz mumkin.
Agar pulingiz uncha ko‘p bo‘lmasa, lekin haqiqatda unutilmas sovg‘a qilishni istasangiz fotosessiya uchun sertifikat, yaxtada, otda sayr qilish uchun to‘lov, mashhur qo‘shiqchining konsertiga chiptalar aynan sizbop sovg‘alardir.
To‘y kunidan roppa-rosa bir oy keyinga belgilangan restorandagi kechki taom yosh oila uchun romantik sovg‘a bo‘la oladi. Ekstremal dam olishni xush ko‘ruvchilar uchun parashyutdan sakrash, kartingga tashrif buyurish yoki kvest-rumga taklifnoma ham ma’qul keladi. Faqat kelin-kuyov avval u yerga bormaganligiga ishonch hosil qiling!
Izoh (0)