Rossiyaning Tu-154 samolyoti bortidagi terakt taxmini istisno etildi

Harbiy tergov tomonidan tayinlangan ekspertlar Suriyaga yo‘l olgan va Qora dengizda qulagan Rossiya mudofaa vazirligiga tegishli Tu-154 ichidan portlatilgani yoki raketa bilan urib tushirilgani alomatlarini aniqlamadi. Shu tariqa, bortda terakt sodir etilgani haqidagi taxmin ro‘yxatdan chiqarib tashlandi. Bu haqda TJournal xabar bermoqda.

Rossiya Federal xavfsizlik xizmati institutining portlash hodisalari bo‘yicha ekspertlari suvdan chiqarib olingan bagaj, kreslolar va fyuzelyaj ichki qoplamasidan portlovchi moddalar izini qidirdi. Shuningdek, mutaxassislar samolyot konstruksiyalari shikastlanishlariga ham baho berdi.

Ekspertlar terakt yoki yerdan o‘qqa tutilganidan bilvosita bo‘lsa-da, dalolat beruvchi hech bir omilni topmadi. Shu bois tergov shundoq ham yetakchi o‘rinda turmagan terakt taxminini butkul istisno etmoqda.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.