Toshkentning “Bunyodkor” klubi BAAda davom etayotgan qishki yig‘inida navbatdagi o‘rtoqlik uchrashuvini bugun, 10-yanvar kuni Gana terma jamoasiga qarshi o‘tkazdi.
“Sports.uz”ning ma’lum qilishicha, “qaldirg‘ochlar” 0:2 hisobida imkoniyatni boy berdi. Uchrashuvda gollarga zaxiradan maydonga tushirilgan Asamoa Gyan va Frank Acheampong mualliflik qildi.
Qayd etish kerakki, Gana terma jamoasi asosiy tarkib futbolchilari bilan “Bunyodkor”ga qarshilik qildi. Tarkibda Angliya Premyer-ligasida to‘p suradigan Andre Ayyu (“Vest Hem”), Daniel Amarti (“Lester”), Chempionshipda o‘ynaydigan Jordan Ayyu (“Aston Villa”), transfer huquqi “Shanxay SIPG” klubiga tegishli va ayni vaqta BAAning “Al-Ahli” klubida to‘p surayotgan Asamoa Gyan kabi taniqli futbolchilarni ko‘rish mumkin bo‘ldi.
Avvaroq Sergey Lushchan qo‘li ostidagi jamoada serbiyalik futbolchilar Aleksandar Ignatovich va Dushan Michich ko‘rikdan o‘tayotgani haqida xabar berilgandi. Har ikki legioner Ganaga qarshi o‘yinda ishtirok etdi.
Ma’lumot uchun, “Bunyodkor” BAAdagi yig‘ini doirasida o‘tkazilgan ilk o‘yinda mahalliy “Ash-Shaab”ni 2:1 hisobida mag‘lubiyatga uchratgandi. Toshkentliklar yig‘in davomida yana 4 ta o‘rtoqlik o‘yini o‘tkazishni rejalashtirgan.
11-yanvar. “Bunyodkor” — “Xenan Jianye” (Xitoy)
13-yanvar. “Bunyodkor” — “Al-Faysaliy” (Saudiya Arabistoni)
15-yanvar. “Bunyodkor” — “Aberdin” (Shotlandiya)
20-yanvar. “Bunyodkor” — Iordaniya
“Bunyodkor” – Gana termasi 0:2
Gollar: 0:1 — 65 Asamoa Gyan, 0:2 — 75 Frank Acheampong.“Bunyodkor”: M.Zuhurov, D.Ahmadaliyev, A.Ignatovich, I.Qobilov, A.Komilov, M.Dushan, D.Hamdamov, O.Shukurov, E.Shomurodov, J.Esonqulov, V.Chemirtan.
Gana: Dauda (Razak), Afful (Yiadom, 46), Baba (Tette, 82), Boye (Gyima), Mensa (Amarti), Vakaso (Ofori), Atsu (Askua, 76), Badu (Parti), Jordan Ayyu (Asamoan Gyan),Tektepey (Assifua, 76), Andre Ayyu (Frank Acheampong).
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)