2016-yilda oila qurgan va farzandlarini yangi hayotga kuzatgan o‘zbekistonlik san’atkorlar

O‘zbekiston shou-biznesi uchun 2016-yil shov-shuvli to‘ylari bilan ham yodda qoladigan bo‘ldi. Xonanda Shohruxxon va aktrisa Asal Shodiyevaning va nihoyat oila qurgani, Shohrux reper o‘z o‘g‘lining onasi Zlata bilan kutilmaganda to‘y marosimi o‘tkazgani va xonanda Rayhonning ikkinchi marta turmushga chiqishi — 2016-yil to‘ylarining kulminatsion nuqtalaridir.

Oyxon Iforzoda va Shoh Alimovich

22-fevral kuni teleboshlovchilar Oyxon Iforzoda va Shoh Alimovich (Nodirshoh) oila qurdi.

Shohrux reper

2,5 yil avval ayoli Zlata bilan ham sha’riy, ham qonuniy nikohdan o‘tgan Shohrux reper 12-may kuni to‘y bazmini uyushtirdi. Jamoatchilik uchun bergan 13-maydagi bayonotida, xonanda “2,5 yil avval kichkina bayram qilib, oila qurgani, sharoit bo‘lmagani uchun shuncha vaqt to‘y marosimi o‘tkazmagani”ni aytib o‘tdi.

Boshlovchi Gulhida Jo‘rayeva

“Yoshlar” telekanalida namoyish etiladigan “Osh bo‘lsin” ko‘rsatuvi boshlovchisi Gulhida Jo‘rayeva turmushga chiqdi. Nikoh oqshomi 21-may kuni bo‘lib o‘tdi.

Davron Kabulov

Taniqli boshlovchi Davron Kabulov 23-may kuni uylandi. Nikoh oqshomi Toshkentdagi “Mumtoz” to‘yxonasida bo‘lib o‘tdi.

Shohruxxon va Asal Shodiyeva

Yilning eng shov-shuvli va eng ko‘p muhokama qilingan to‘yi! Xonanda Shohruxxon va aktrisa Asal Shodiyevaning nikoh marosimi yilning shou-biznes yo‘nalishidagi eng shov-shuvli voqeasi bo‘ldi. Nikoh oqshomi 5-iyun kuni Toshkentdagi “Osiyo Grand” restoranida bo‘lib o‘tdi.

“Ummon”chi Shohrux

“Ummon” guruhi vakili Shohrux va uning yori — Azizaxonning nikoh oqshomi 15-avgust kuni Toshkentdagi “Yakkasaroy” restoranida bo‘lib o‘tdi. Shunday qilib, “Ummon” a’zolaridan faqat Zohid bo‘ydoqligicha qoldi.

Xonanda Karen Gafurjanov

O‘zbek estradasining eng yoshi ulug‘ bo‘ydoqlaridan biri sanalgan Karen Gafurjanov 20-sentyabr kuni uylandi. Xonandaning visol oqshomi “O‘zbekiston” mehmonxonasida bo‘lib o‘tdi.

Aktyor Rasulxon Qodirxonov

“Opa-singillar” teleserialidagi Ikrom roli bilan tanilgan aktyor Rasulxon Qodirxonov 16-oktabr kuni uylandi. Ahamiyatli tomoni, aktyorning to‘yi ukasi bilan bir kunda bo‘lib o‘tdi.

Xonanda Rayhon

2016-yil noyabri boshida xonanda Rayhon ikkinchi marta turmushga chiqqani ma’lum bo‘ldi. Xonandaning boshlovchi Farhod Alimov bilan nikohdan o‘tishi katta shov-shuvlarga sabab bo‘ldi.

Aktrisa Shahzoda Matchonova

Aktrisa Shahzoda Matchonova 25-noyabr kuni turmushga chiqdi. To‘y oqshomi Toshkentdagi “Yakkasaroy” to‘yxonasida bo‘lib o‘tdi. Aktrisa ismi yo Omar, yo Muzaffar bo‘lgan yigitga turmushga chiqqani xabar qilindi.

Farzandining to‘yini o‘tkazgan mashhur ota-onalar

Qiziqchi Zokir Ochildiyev qizini turmushga berdi

“Handalak” guruhi qiziqchisi Zokir Ochildiyev 30-mart kuni qizini turmushga berdi. To‘y marosimi Toshkentdagi “Ezidyor” restoranida bo‘lib o‘tgan. Qiziqchi o‘z do‘sti bilan quda bo‘lgan.

Qiziqchi Mirzabek Xolmedov qizini turmushga berdi

Oktyabr oyida O‘zbekistonda xizmat ko‘rsatgan artist Mirzabek Xolmedov qizi Durdonani uzatdi.

Suxandon Abdumo‘min O‘tbosarovning o‘g‘li Jamshid uylandi

Marhum suxandon Abdumo‘min O‘tbosarovning o‘g‘li Jamshid uylandi. Bu haqda 13-noyabr kuni Abdumo‘min O‘tbosarovning yaqin do‘sti, taniqli suxandon Muslimbek Yo‘ldoshev ma’lum qildi.

Xonanda Og‘abek Sobirov to‘ng‘ich qizini uzatdi

O‘zbekistonda xizmat ko‘rsatgan artist Og‘abek Sobirov to‘ng‘ich qizi Gulruhxonni turmushga berdi. To‘y marosimi 9-noyabr kuni Xorazm viloyatida bo‘lib o‘tdi.

Hosila Rahimova ikkinchi qizi Iqbolxonni turmushga berdi

Dekabr oyida O‘zbekistonda xizmat ko‘rsatgan artist Hosila Rahimova ikkinchi qizi Iqbolxonni turmushga berdi. Nikoh oqshomi “Mumtoz” restoranida bo‘lib o‘tdi. To‘ydan biroz avval xonanda qizining unashtiruviga bag‘ishlab, Surxondaryoda ko‘pkari uyushtirgan edi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.