O‘zbekiston adliya vazirligi litsenziya va ruxsat beruvchi jarayonlarni qisqartirish va soddalashtirish bo‘yicha hukumat qarorining loyihasini e’lon qildi. Hujjat Prezidentning 5-oktabrdagi “Tadbirkorlik faoliyatining jadal rivojlanishini ta’minlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qo‘shimcha chora-tadbirlar to‘g‘risida”gi farmoniga asosan ishlab chiqildi, deb xabar beradi “Gazeta.uz”.
Qaror loyihasida 2017-yil 1-aprelidan boshqa yo‘llar qatorida birlashtirish yo‘li bilan bekor qilinadigan litsenziyalanuvchi faoliyat turlari hamda tadbirkorlik faoliyati sohasidagi ruxsat berish jarayonlari ro‘yxati, shuningdek, 1-iyuldan boshlab litsenziyalar hamda ruxsatnoma hujjatlari rasmiylashtirilishi muddati qisqartiriladigan faoliyat turlari ro‘yxati taklif etiladi.
1-iyuldan e’tiboran alohida faoliyat turlarini litsenziyalash funksiyasini Vazirlar Mahkamasidan tegishli davlat organlariga topshirish taklif etilmoqda. Bundan tashqari, joriy qilinadigan qoidaga ko‘ra, agar litsenziya beruvchi organ murojaatni ko‘rib chiqish muxlati davomida litsenziya bermasa yoki litsenziya berishdan bosh tortmasa, da’vogar litsenziya beruvchi organni yozma ravishda boxabar qilgan holda litsenziya so‘ralgan soha bo‘yicha faoliyat yuritishi mumkin bo‘ladi.
Hujjatga sharhlarda qayd qilinishicha, qarorning qabul qilinishi tadbirkorlikning iqtisodiyotning barqaror taraqqiyotidagi asosiy omil sifatida rivojlanishi yo‘lidagi to‘siqlarni bartaraf etish, tadbirkorlik faoliyatining davlat tomonidan nazorat qilinishining eskirgan va ortiqcha funksiyalarini tugatish imkonini beradi, shuningdek, korrupsiogen omillar shakllanishini istisno qilish hamda byurokratiya faktlarini yo‘q qilishga yordam beradi.
Qaror loyihasi muhokamasi 2017-yil 11-yanvariga qadar davom etadi.
Izoh (0)