Тадбиркорларга лицензия бериш жараёнларини осонлаштириш таклиф қилинмоқда
Ўзбекистон адлия вазирлиги лицензия ва рухсат берувчи жараёнларни қисқартириш ва соддалаштириш бўйича ҳукумат қарорининг лойиҳасини эълон қилди. Ҳужжат Президентнинг 5 октябрдаги «Тадбиркорлик фаолиятининг жадал ривожланишини таъминлашга, хусусий мулкни ҳар томонлама ҳимоя қилишга ва ишбилармонлик муҳитини сифат жиҳатидан яхшилашга доир қўшимча чора-тадбирлар тўғрисида»ги фармонига асосан ишлаб чиқилди, деб хабар беради «Газета.uz».
Қарор лойиҳасида 2017 йил 1 апрелидан бошқа йўллар қаторида бирлаштириш йўли билан бекор қилинадиган лицензияланувчи фаолият турлари ҳамда тадбиркорлик фаолияти соҳасидаги рухсат бериш жараёнлари рўйхати, шунингдек, 1 июлдан бошлаб лицензиялар ҳамда рухсатнома ҳужжатлари расмийлаштирилиши муддати қисқартириладиган фаолият турлари рўйхати таклиф этилади.
1 июлдан эътиборан алоҳида фаолият турларини лицензиялаш функциясини Вазирлар Маҳкамасидан тегишли давлат органларига топшириш таклиф этилмоқда. Бундан ташқари, жорий қилинадиган қоидага кўра, агар лицензия берувчи орган мурожаатни кўриб чиқиш мухлати давомида лицензия бермаса ёки лицензия беришдан бош тортмаса, даъвогар лицензия берувчи органни ёзма равишда бохабар қилган ҳолда лицензия сўралган соҳа бўйича фаолият юритиши мумкин бўлади.
Ҳужжатга шарҳларда қайд қилинишича, қарорнинг қабул қилиниши тадбиркорликнинг иқтисодиётнинг барқарор тараққиётидаги асосий омил сифатида ривожланиши йўлидаги тўсиқларни бартараф этиш, тадбиркорлик фаолиятининг давлат томонидан назорат қилинишининг эскирган ва ортиқча функцияларини тугатиш имконини беради, шунингдек, коррупциоген омиллар шаклланишини истисно қилиш ҳамда бюрократия фактларини йўқ қилишга ёрдам беради.
Қарор лойиҳаси муҳокамаси 2017 йил 11 январига қадар давом этади.
