2016-yilgi mavsumni Qarshining “Nasaf” klubi safida o‘tkazgan Fozil Musayev Yaponiyaning “Jubilo Ivata” klubi bilan muzokara olib borayotgani aytilgandi. Yarim himoyachi yapon jamoasi bilan 2+1 ko‘rinishidagi shartnomaga imzo chekdi, deb yozdi “Fut.uz”.
Bu haqda Musayevning agenti San’at Sharipov ma’lumot bergan. Shartnoma aslida 3 yilga mo‘ljallangan bo‘lib, shuning ikki yili borasida kelishuv to‘liq amalga oshgan. Ikki tomonning ikki yillik hamkorligi uning yana bir yilga cho‘zilishiga xizmat qilishi ham mumkin.
“Muzokaraga nihoyat nuqta qo‘ydik. Tibbiy ko‘rik muvaffaqiyatli o‘tdi va bitim imzoladik. Bu biz uchun katta voqea, chunki Yaponiyada shu kunga qadar o‘zbekistonlik futbolchi to‘p surmagan”, — dedi xalqaro sport yuristi San’at Sharipov.
“Men nafaqat o‘zim uchun, balki butun O‘zbekiston nomidan Yaponiyada to‘p suraman. Shu bois borimni berib o‘ynashim kerakligini his qilib turibman. Sharoit va imkoniyatlar ajoyib, talab qilinadigani faqat yaxshi futbol ko‘rsatish. Bu hayotimning eng muhim bosqichlaridan biri”, — deb aytib o‘tgan Fozil Musayev.
Yaqin o‘tmishning Yaponiyadagi mashhur futbolchilaridan biri Xiroshi Nanami boshchilik qilayotgan “Jubilo Ivata” Yaponiya Jey Ligasidagi 18 ta klub orasida 14-o‘rinda. Jamoa safida o‘z vaqtida Dunga, Salvatore Skilachchi, Dmitriy Radchenko kabi mashhur futbolchilar to‘p surgan. Klub o‘z tarixida 4 bor mamlakat chempionligini qo‘lga kiritgan.
2016-yilning 2-davrasida Fozil Musayev “Nasaf” uchun 15 ta o‘yinda maydonga tushib, 2 ta gol urishga muvaffaq bo‘ldi. O‘z vaqtida “Mash’al”, “Bunyodkor”, “Lokomotiv” kabi klublarda to‘p surgan Musayev, 2013/14-yilgi mavsumda Qatarning “Al-Mauydar”, 2014/16-yilgi mavsumlarda Eronning “Sepahon” klubida o‘ynagan.
Izoh (0)