2016 йилги мавсумни Қаршининг «Насаф» клуби сафида ўтказган Фозил Мусаев Япониянинг «Жубило Ивата» клуби билан музокара олиб бораётгани айтилганди. Ярим ҳимоячи япон жамоаси билан 2+1 кўринишидаги шартномага имзо чекди, деб ёзди «Fut.uz».
Бу ҳақда Мусаевнинг агенти Санъат Шарипов маълумот берган. Шартнома аслида 3 йилга мўлжалланган бўлиб, шунинг икки йили борасида келишув тўлиқ амалга ошган. Икки томоннинг икки йиллик ҳамкорлиги унинг яна бир йилга чўзилишига хизмат қилиши ҳам мумкин.
«Музокарага ниҳоят нуқта қўйдик. Тиббий кўрик муваффақиятли ўтди ва битим имзоладик. Бу биз учун катта воқеа, чунки Японияда шу кунга қадар ўзбекистонлик футболчи тўп сурмаган», — деди халқаро спорт юристи Санъат Шарипов.
«Мен нафақат ўзим учун, балки бутун Ўзбекистон номидан Японияда тўп сураман. Шу боис боримни бериб ўйнашим кераклигини ҳис қилиб турибман. Шароит ва имкониятлар ажойиб, талаб қилинадигани фақат яхши футбол кўрсатиш. Бу ҳаётимнинг энг муҳим босқичларидан бири», — деб айтиб ўтган Фозил Мусаев.
Яқин ўтмишнинг Япониядаги машҳур футболчиларидан бири Хироши Нанами бошчилик қилаётган «Жубило Ивата» Япония Жей Лигасидаги 18 та клуб орасида 14-ўринда. Жамоа сафида ўз вақтида Дунга, Сальваторе Скилаччи, Дмитрий Радченко каби машҳур футболчилар тўп сурган. Клуб ўз тарихида 4 бор мамлакат чемпионлигини қўлга киритган.
2016 йилнинг 2-даврасида Фозил Мусаев «Насаф» учун 15 та ўйинда майдонга тушиб, 2 та гол уришга муваффақ бўлди. Ўз вақтида «Машъал», «Бунёдкор», «Локомотив» каби клубларда тўп сурган Мусаев, 2013/14 йилги мавсумда Қатарнинг «Ал-Мауйдар», 2014/16 йилги мавсумларда Эроннинг «Сепаҳон» клубида ўйнаган.
Изоҳ (0)