Zlatan Ibrahimovich o‘z haykali oldida suratga tushdi. U hayotligida haykali o‘rnatilgan birinchi futbolchi emas

“Manchester Yunayted” klubining shvetsiyalik hujumchisi Zlatan Ibrahimovich Instagram’dagi sahifasiga o‘z haykali oldida tushgan suratini yukladi.

“Nyu-Yorkka kelganingizda, Ozodlik haykalin ko‘rasiz, Shvetsiyaga kelsangiz – Zlatan haykalini ko‘rasiz”, – deya haykalining yaqin kunlarda o‘rnatilishi kutilayotganiga sha’ma qilib suratini izohladi shvetsiyalik futbolchi.

Qayd etish joiz, Zlatan Ibrahimovich hayotligida haykali o‘rnatilgan birinchi futbol namoyondasi bo‘lmaydi. 35 yoshli hujumchiga qadar Aleks Fergyuson, Tyerri Anri, Zinedin Zidan, Krishtianu Ronaldu va Lionel Messi singari futbol vakillarining haykallari o‘rnatilgan.

Tyerri Anri

“Arsenal”ning afsonaviy fransiyalik futbolchisi Tyerri Anriga 2011-yili “Emireyts” stadioni oldida haykal o‘rnatilgan.

Aleks Fergyuson

1986–2013-yillar davomida “Manchester Yunayted” klubini boshqargan ser Aleks Fergyusonning bronzada yasalgan haykali 2012-yilning “Old Trafford” stadioni oldida o‘rnatilgan. Bundan tashqari, “MYu”ga tegishli stadionning tribunalaridan biri uning nomiga atalgan.

Zinedin Zidan

Fransiyalik sobiq futbolchi, “Real”ning amaldagi bosh murabbiyi Zinedin Zidan Italiyaga qarshi 2006-yilgi jahon chempionati finalining eng yodga qolarli vaziyatiga sababchi bo‘lgandi. Zidanning Marko Materatssiga kalla qo‘ygan haykali 2012-yili Parij shahrida, 2013-yili esa Qatar poytaxti Doha shahrida o‘rnatilgan.

Krishtianu Ronaldu

To‘rt karra “Oltin to‘p” sohibi Krishtianu Ronalduga 2014-yili o‘zi tug‘ilib o‘sgan Madeyra shaharchasida haykal o‘rnatilgandi.

Lionel Messi

Argentina termasi Amerika Kubogi–2016 finalida Chiliga mag‘lub bo‘lganidan so‘ng, Lionel Messi termadagi faoliyatini yakunlashi haqida e’lon qilgandi. Messini o‘z fikridan qaytarish uchun Buenos-Ayresda unga atalgan haykal o‘rnatilgan edi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.