Tramp The New York Times jurnalistlari bilan uchrashuvni bekor qilish fikrini o‘zgartirdi

22-noyabr, seshanba kuni The New York Times nashri jurnalistlari bilan uchrashuvni bekor qilgan AQShning yangi saylangan prezidenti Donald Tramp, oxir-oqibat ular bilan uchrashishga qaror qildi, deb yozadi “Interfaks” siyosatchining Twitter’iga tayanib.

“The New York Times bilan uchrashuv yana kun tartibida — 12:30 da (Toshkent vaqti bilan 22:30). Uni sabrsizlik bilan kutaman!” — deyiladi xabarda.

Avvalroq Tramp Twitter orqali uchrashuv bekor qilinganini aytgan, chunki, uning fikricha, nashr xodimlari so‘nggi lahzada tadbir shartlari va shaklini o‘zgartirgan. Ammo shunga qaramay, Tramp keyinroq uchrashuv bo‘lib o‘tishi mumkinligini ma’lum qildi.

The New York Times versiyasiga ko‘ra esa, gazeta rahbariyati uchrashuv shartlarini o‘zgartirmagan, aksincha, nomaqbul talablar Tramp va uning atrofidagilardan tushgan. “Ular yozib olinmaydigan shaxsiy uchrashuv o‘tkazishni so‘rashdi, biz esa rad etdik”, — dedi gazeta vakili.