Noyabrda bo‘lib o‘tadigan AQSh prezidentlik lavozimi uchun saylovlarda Hillari Klinton g‘alaba qozongan taqdirda AQShning davlat kotibi lavozimiga nomzodlar short-listida Jozef Bayden yetakchilik qilmoqda. Bu haqda 27-oktabr, payshanba kuni Politico gazetasi ma’lum qildi, deb yozadi “TASS”.
Nashrning qayd etishicha, na Klinton, na uning atrofidagilar qabul qilingan qaror haqida Baydenga ma’lum qilmagan. Jozef 2009-yilning yanvaridan buyon AQSh vitse-prezidenti lavozimini egallab kelmoqda. Klinton ham, Bayden ham Qo‘shma Shtatlar Demokratik partiyasining vakillari hisoblanadi.
Klinton mamlakat rahbari etib saylangan taqdirda davlat kotibi lavozimini egallashi mumkin bo‘lgan nomzodlar ro‘yxatidan AQSh davlat kotibining Sharqiy Osiyo va Tinch okeani masalalari bo‘yicha yordamchisi lavozimini egallagan Kurt Kempbell, davlat kotibining sobiq birinchi o‘rinbosarlari Uilyam Berns va Stroub Telbott, davlat kotibining siyosiy masalalar bo‘yicha sobiq o‘rinbosari Uendi Shermanlar ham joy olgan.
Shuningdek, ro‘yxatga iste’fodagi admiral, NATOning Yevropadagi Birlashgan qurolli kuchlari sobiq oliy bosh qo‘mondoni Jeyms Stavridis ham kiritildi.
Izoh (0)