Ноябрда бўлиб ўтадиган АҚШ президентлик лавозими учун сайловларда Ҳиллари Клинтон ғалаба қозонган тақдирда АҚШнинг давлат котиби лавозимига номзодлар шорт-листида Жозеф Байден етакчилик қилмоқда. Бу ҳақда 27 октябрь, пайшанба куни Politico газетаси маълум қилди, деб ёзади «ТАСС».
Нашрнинг қайд этишича, на Клинтон, на унинг атрофидагилар қабул қилинган қарор ҳақида Байденга маълум қилмаган. Жозеф 2009 йилнинг январидан буён АҚШ вице-президенти лавозимини эгаллаб келмоқда. Клинтон ҳам, Байден ҳам Қўшма Штатлар Демократик партиясининг вакиллари ҳисобланади.
Клинтон мамлакат раҳбари этиб сайланган тақдирда давлат котиби лавозимини эгаллаши мумкин бўлган номзодлар рўйхатидан АҚШ давлат котибининг Шарқий Осиё ва Тинч океани масалалари бўйича ёрдамчиси лавозимини эгаллаган Курт Кэмпбелл, давлат котибининг собиқ биринчи ўринбосарлари Уильям Бернс ва Строуб Телботт, давлат котибининг сиёсий масалалар бўйича собиқ ўринбосари Уэнди Шерманлар ҳам жой олган.
Шунингдек, рўйхатга истеъфодаги адмирал, НАТОнинг Европадаги Бирлашган қуролли кучлари собиқ олий бош қўмондони Жеймс Ставридис ҳам киритилди.
Изоҳ (0)