Toshkent shahar bodibilding va fitness federatsiyasi prezidenti, bodibilding bo‘yicha qator musoboqalar sovrindori, sport ustasi, ayni vaqtda filmlarda rol ham o‘ynayotgan Habibulla Nizomov jurnalist Feruz Muhammadga intervyu berdi.
Avvalroq u bilan uyushtirilgan intervyuning faqat sportga daxldor qismini e’tiboringizga havola qilgan edik. Quyida ham sportchi, ham aktyorning kinodagi faoliyati haqida ma’lumot olishingiz mumkin.
— Sizni ilk bor xonanda Ozodbek Nazarbekovning konsertida, “Nafsiga qul kimsalar” nomli qo‘shiq uchun tayyorlangan sahna ko‘rinishida ko‘rganmiz. Bu faoliyatingizdagi ilk rolmidi?— Yo‘q, bungacha ham “Qaroqchilar” nomli filmda Terminator rolini o‘ynaganman.
— Rustam Sa’diyevning “Baron” filmidagi ishtirokingiz ayniqsa yorqin chiqqan. Rejissorning boshqa kartinalarida ham rol ijro etganmisiz?— “Sevgi balki bu jannat” nomli loyihaning birinchi va ikkinchi filmlarida hayotdagi prototipimni o‘ynaganman, ya’ni sport murabbiyi rolini gavdalantirganman.
— Eshitishimizcha, filmlarga prodyuserlik ham qilarkansiz?— Faqat “Sevgi balki bu jannat” kinoloyihasi doirasida olingan ikki filmga prodyuserlik qilganman.
— “Baron” filmi, undagi rolingiz, muxlislarning sizga va rolingizga munosabati qanday bo‘ldi?— Bir kuni Rustam aka: “Sizga mos juda yaxshi rol bor”, deb qoldi. Bu rolga o‘zimning ham qiziqishim bor edi. Filmda Ulug‘bek Qodirovning qahramoni bilan mushtlashib ketishim kerak bo‘lgan holat, Muhammadiso akani bo‘g‘adigan vaqtim, qamoqxona boshlig‘i chaqirganida, uning oldiga qo‘rqib kirishim va oxiri, Ulug‘bek meni urganida, unga dardihol qilishim kerak bo‘lgan holatlarni, ya’ni, bir filmning o‘zida juda jahldor odam, qo‘rquv iskanjasida qolgan mahbus va oddiy dardmand insonni ko‘rsatib berishim kerak edi. Rolim ishonarli chiqishi uchun mahbuslar hayotini hayotini imkon qadar o‘rganishga harakat qildim. To‘g‘risi, hayotda u qadar jahldor emasman, shuning uchun jahldor kishi holatini ko‘plarda qidirdim. Axiyri men qidirgan jahldor qamoqxonada ishlar ekan, o‘sha kishini kuzatib, o‘rgandim va rolimni chiqarib berishga harakat qildim.
Boshida filmdagi rolim kichkina ekani, boz ustiga ham mahbus bo‘lib, ham hayotdagi shogirdimdan kaltak yeyishim biroz yoqmagan edi. Keyinchalik rolim o‘zimga yoqib qoldi. Boshqa aktyorlar sochini oldirmasa ham, men ataylab shu film uchun sochimni ham oldirgan edim. Shu rolni jon-jahdimni berib o‘ynashga harakat qildim. Avvallari odamlar ko‘chada ko‘rib qolsa: “E, anavi kinolarda o‘ynaydigan kishi-ku”, deyishardi, hozir esa “‘Baron’da o‘ynagan aktyor”, deb aniq, ravshan tanishmoqda.
— Sport bilan kinoni birga olib ketadigan aktyorlar orasida o‘zingizga raqib deb hisoblaydiganlaringiz kimlar?— Men Toshkent davlat iqsodiyot universitetini tugatganman, tadbirkorlik bilan shug‘ullanaman. O‘zimni hech qayerda aktyor deb tanishtirmayman, hatto ba’zi joylarda “Habibulla Nizomov, aktyor” deb yozishsa, “E, meni aktyor deb yozishibdimi?”, deb ajablanib qolaman. Aslida sportga ham, kino olamiga ham kech kirib kelganman. Shu sabab o‘zimni aktyor deb bilmayman va o‘zimni boshqa aktyorlarga raqobatchi sanamayman.
— Kino, reklama va kliplarda rol ijro etish taklifi tushganida, taklifning moliyaviy tomoni siz uchun qay darajada ahamiyatli?— Avvalo, o‘sha rol menga to‘g‘ri keladimi-yo‘qmi, ssenariysi qanday, shularni surishtirib ko‘raman. Klip bo‘lsa, o‘zim yoqtirgan xonanda uchun ssenariysiga ham, puliga ham qaramay rozilik bildiraman. Oxirgi vaqtlarda sportcha ko‘rinishdagi odamlarga yo tansoqchi, yo salbiy qahramon rolini berishyapti, yoki sevishganlarning orasiga tushadigan inson obrazi. Xullas, bu borada juda bir xillik bo‘lib ketgan. Har bir film yoki klipda o‘z yuzimni, xarakterimni ochib berishlarini xohlardim. Buning uchun tanamni umuman ko‘rsatmasalar ham roziman. Misol uchun, Shuhrat Abbosovning “Dilor, dilor, dil va or” nomli filmida faqat yuzim bilan o‘ynadim, u yerda tanam kerak ham emas edi. Ssenariyda raqibim kelib qolganida, qo‘rqadigan joyim bor edi, Badiiy kengashdagilar: “Habibulla balodan ham qo‘rqmaydi-ku, kelib bizga o‘ynab bersin, bo‘lmasa bu rolni unga bera olmaymiz”, deyishganida, o‘sha kolxoz raisini qo‘rqadigan holatini o‘ynab berganimdan keyingina meni rolga tasdiqlashgan.
— Ma’lumotlarga ko‘ra, siz rejissor Shuhrat Abbosovning “Mahallada duv-duv gap 2” filmida ham suratga tushayotgan ekansiz.— Shogirdlarim: “Hamma kinoda kaltak yeysiz, ‘Baron’da Ulug‘bek Qodirovdan kaltak yedingiz, boshqa filmda bittasi sizni ko‘tarib urdi”, deydi. Uchrashuvlarda ham kino ixlosmandlari: “Har doim kaltak yeydigan odamlarni o‘ynashingiz sportchi sifatida maqomingizga ta’sir qilmaydimi?”, deb ko‘p savol beradi. Ularga: “Bu kino-ku”, deb javob berib, qutilaman. Shuhrat Abbosovning filmidagi holatim hamma rollarimdan ham o‘tib tushadi: unda karatechi qiz chakagimga tepadi, men esa uning zarbidan yiqilaman. Agar bu rolni boshqa bir rejissor taklif qilganida, ikki dunyoda ham rozi bo‘lmasdim, ammo Shuhrat Abbosovdek darg‘aning taklifini rad qila olmadim. Bu rejissorning filmida rol ijro etishni orzu qilmagan o‘zbek bo‘lmasa kerak.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)