Тошкент шаҳар бодибилдинг ва фитнесс федерацияси президенти, бодибилдинг бўйича қатор мусобоқалар совриндори, спорт устаси, айни вақтда фильмларда рол ҳам ўйнаётган Ҳабибулла Низомов журналист Феруз Муҳаммадга интервью берди.
Аввалроқ у билан уюштирилган интервьюнинг фақат спортга дахлдор қисмини эътиборингизга ҳавола қилган эдик. Қуйида ҳам спортчи, ҳам актёрнинг кинодаги фаолияти ҳақида маълумот олишингиз мумкин.
— Сизни илк бор хонанда Озодбек Назарбековнинг концертида, «Нафсига қул кимсалар» номли қўшиқ учун тайёрланган саҳна кўринишида кўрганмиз. Бу фаолиятингиздаги илк ролмиди?— Йўқ, бунгача ҳам «Қароқчилар» номли фильмда Терминатор ролини ўйнаганман.
— Рустам Саъдиевнинг «Барон» фильмидаги иштирокингиз айниқса ёрқин чиққан. Режиссёрнинг бошқа картиналарида ҳам рол ижро этганмисиз?— «Севги балки бу жаннат» номли лойиҳанинг биринчи ва иккинчи фильмларида ҳаётдаги прототипимни ўйнаганман, яъни спорт мураббийи ролини гавдалантирганман.
— Эшитишимизча, фильмларга продюсерлик ҳам қиларкансиз?— Фақат «Севги балки бу жаннат» кинолойиҳаси доирасида олинган икки фильмга продюсерлик қилганман.
— «Барон» фильми, ундаги ролингиз, мухлисларнинг сизга ва ролингизга муносабати қандай бўлди?— Бир куни Рустам ака: «Сизга мос жуда яхши рол бор», деб қолди. Бу ролга ўзимнинг ҳам қизиқишим бор эди. Фильмда Улуғбек Қодировнинг қаҳрамони билан муштлашиб кетишим керак бўлган ҳолат, Муҳаммадисо акани бўғадиган вақтим, қамоқхона бошлиғи чақирганида, унинг олдига қўрқиб киришим ва охири, Улуғбек мени урганида, унга дардиҳол қилишим керак бўлган ҳолатларни, яъни, бир фильмнинг ўзида жуда жаҳлдор одам, қўрқув исканжасида қолган маҳбус ва оддий дардманд инсонни кўрсатиб беришим керак эди. Ролим ишонарли чиқиши учун маҳбуслар ҳаётини ҳаётини имкон қадар ўрганишга ҳаракат қилдим. Тўғриси, ҳаётда у қадар жаҳлдор эмасман, шунинг учун жаҳлдор киши ҳолатини кўпларда қидирдим. Ахийри мен қидирган жаҳлдор қамоқхонада ишлар экан, ўша кишини кузатиб, ўргандим ва ролимни чиқариб беришга ҳаракат қилдим.
Бошида фильмдаги ролим кичкина экани, боз устига ҳам маҳбус бўлиб, ҳам ҳаётдаги шогирдимдан калтак ейишим бироз ёқмаган эди. Кейинчалик ролим ўзимга ёқиб қолди. Бошқа актёрлар сочини олдирмаса ҳам, мен атайлаб шу фильм учун сочимни ҳам олдирган эдим. Шу ролни жон-жаҳдимни бериб ўйнашга ҳаракат қилдим. Авваллари одамлар кўчада кўриб қолса: «Э, анави киноларда ўйнайдиган киши-ку», дейишарди, ҳозир эса «‘Барон’да ўйнаган актёр», деб аниқ, равшан танишмоқда.
— Спорт билан кинони бирга олиб кетадиган актёрлар орасида ўзингизга рақиб деб ҳисоблайдиганларингиз кимлар?— Мен Тошкент давлат иқсодиёт университетини тугатганман, тадбиркорлик билан шуғулланаман. Ўзимни ҳеч қаерда актёр деб таништирмайман, ҳатто баъзи жойларда «Ҳабибулла Низомов, актёр» деб ёзишса, «Э, мени актёр деб ёзишибдими?», деб ажабланиб қоламан. Аслида спортга ҳам, кино оламига ҳам кеч кириб келганман. Шу сабаб ўзимни актёр деб билмайман ва ўзимни бошқа актёрларга рақобатчи санамайман.
— Кино, реклама ва клипларда рол ижро этиш таклифи тушганида, таклифнинг молиявий томони сиз учун қай даражада аҳамиятли?— Аввало, ўша рол менга тўғри келадими-йўқми, сценарийси қандай, шуларни суриштириб кўраман. Клип бўлса, ўзим ёқтирган хонанда учун сценарийсига ҳам, пулига ҳам қарамай розилик билдираман. Охирги вақтларда спортча кўринишдаги одамларга ё тансоқчи, ё салбий қаҳрамон ролини беришяпти, ёки севишганларнинг орасига тушадиган инсон образи. Хуллас, бу борада жуда бир хиллик бўлиб кетган. Ҳар бир фильм ёки клипда ўз юзимни, характеримни очиб беришларини хоҳлардим. Бунинг учун танамни умуман кўрсатмасалар ҳам розиман. Мисол учун, Шуҳрат Аббосовнинг «Дилор, дилор, дил ва ор» номли фильмида фақат юзим билан ўйнадим, у ерда танам керак ҳам эмас эди. Сценарийда рақибим келиб қолганида, қўрқадиган жойим бор эди, Бадиий кенгашдагилар: «Ҳабибулла балодан ҳам қўрқмайди-ку, келиб бизга ўйнаб берсин, бўлмаса бу ролни унга бера олмаймиз», дейишганида, ўша колхоз раисини қўрқадиган ҳолатини ўйнаб берганимдан кейингина мени ролга тасдиқлашган.
— Маълумотларга кўра, сиз режиссёр Шуҳрат Аббосовнинг «Маҳаллада дув-дув гап 2» фильмида ҳам суратга тушаётган экансиз.— Шогирдларим: «Ҳамма кинода калтак ейсиз, ‘Барон’да Улуғбек Қодировдан калтак едингиз, бошқа фильмда биттаси сизни кўтариб урди», дейди. Учрашувларда ҳам кино ихлосмандлари: «Ҳар доим калтак ейдиган одамларни ўйнашингиз спортчи сифатида мақомингизга таъсир қилмайдими?», деб кўп савол беради. Уларга: «Бу кино-ку», деб жавоб бериб, қутиламан. Шуҳрат Аббосовнинг фильмидаги ҳолатим ҳамма ролларимдан ҳам ўтиб тушади: унда каратечи қиз чакагимга тепади, мен эса унинг зарбидан йиқиламан. Агар бу ролни бошқа бир режиссёр таклиф қилганида, икки дунёда ҳам рози бўлмасдим, аммо Шуҳрат Аббосовдек дарғанинг таклифини рад қила олмадим. Бу режиссёрнинг фильмида рол ижро этишни орзу қилмаган ўзбек бўлмаса керак.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)