Futbol bo‘yicha O‘zbekiston Oliy Ligasi ishtirokchisi – Qarshining “Nasaf” klubiga tegishli “Markaziy” stadionda rekonstruksiya ishlari boshlandi. Bu haqda “Voha.uz” xabar bermoqda.
Xabarda qayd etilishicha, rekonstruksiya ishlari bosqichma-bosqich olib boriladi. Dastlab futbol maydoni va tomoshabinlar uchun o‘rindiqlar yangilanib, qo‘shimcha sektorlar barpo etiladi. Stadion sektorlari uzra ayvonlar – tomoshabinlarni quyosh tafti va yomg‘irdan asraydigan qilib, yarim yopiq ko‘rinishida barpo etiladi.
Shuningdek, rekonstruksiya davomida stadion hududida bir nechta qo‘shimcha bino va inshootlar ham quriladi. “Markaziy” stadionda boshlangan rekonstruksiya ishlari 2017-yilning bahor faslida tugatilishi ko‘zda tutilgan.
“Markaziy” stadiondagi qayta qurilish ishlari munosabati bilan “Nasaf”ning mavsumdagi qolgan uchrashuvlari “Geolog” stadionida o‘tkazilishi rejalashtirilmoqda.
Izoh (0)