Floridada dunyodagi eng keksa lamantin aniqlandi (video)

Ginness rekordlar kitobi vakillari AQShning Florida shtatidagi Brandenton shahri okeanariumida dunyodagi eng keksa lamantinni aniqladi. Snuti laqabli jonivorning yoshi 68 da bo‘lib, u butun umr mahalliy hovuzda yashagan, deb xabar beradi “Vesti.ru”.

Keksa lamantinning hayoti haqidagi videorolik Ginness kitobining YouTube’dagi rasmiy kanalida e’lon qilindi.

Snuti 1948-yilning 21-iyul kuni dunyoga kelgan. U ko‘pdan buyon shaharning eng diqqatga sazovor jonivorlaridan biriga aylangan.

Florida lamantinlari 4,5 metrdan ortiq uzunlikka ega bo‘lishi mumkin. Ilgari ular go‘shti va yog‘i uchun ovlangan, hozirgi paytda esa ushbu jonivorlarni ovlash taqiqlangan.