Markaziy saylov komissiyasidagi muzokaralarda EXHT missiyasi faoliyatini samarali tashkil etish muhokama qilindi

Markaziy saylov komissiyasida 11-oktabr, seshanba kuni Yevropada xavfsizlik va hamkorlik tashkiloti Demokratik institutlar va inson huquqlari bo‘yicha byurosi Saylovlar departamenti boshlig‘i Aleksandr Shlik boshchiligidagi Ehtiyojlarni baholash missiyasi ekspertlari bilan uchrashuv bo‘lib o‘tdi. Bu haqda “Daryo”ga O‘zbekiston Respublikasi Prezidenti saylovini yoritish bo‘yicha Respublika matbuot markazi xabar berdi.

Markaziy saylov komissiyasi raisi Mirzo-Ulug‘bek Abdusalomov ekspertlarga O‘zbekiston Respublikasi Prezidenti sayloviga tayyorgarlik doirasida Markaziy saylov komissiyasi va okrug saylov komissiyalari tomonidan olib borilayotgan ishlar haqida batafsil axborot berdi. 

Fuqarolarning saylov huquqlari kafolatlarini ta’minlash maqsadida huquqni qo‘llash amaliyoti takomillashib borayotganligi, bunda YeXHT Demokratik institutlar va inson huquqlari bo‘yicha byurosining avvalgi saylovlarni kuzatish natijalari bo‘yicha taqdim etgan tavsiyalari muhim ahamiyatga ega bo‘lgani ta’kidlandi. 

Uchrashuvda Ehtiyojlarni baholash missiyasi ekspertlari faoliyatini samarali tashkil etish, ikki tomonlama hamkorlikni yanada mustahkamlash va tomonlarni qiziqtirgan boshqa masalalar yuzasidan atroflicha fikr almashildi.