O‘zbekistonga investitsion muhitni o‘rganish uchun Yaponiya ishbilarmonlari delegatsiyasi keldi

O‘zbekistonga Yaponiya ishbilarmon doiralari delegatsiyasi keldi. Yaponiya Tashqi savdoni rivojlantirish tashkiloti (JETRO) tomonidan uyushtirilgan tashrifdan ko‘zlangan maqsad mamlakatdagi investitsion muhit, iste’mol bozori salohiyatini o‘rganish hamda mamlakat kompaniyalari bilan uzoq muddatli aloqalarni o‘rnatishdan iborat. Bu haqda “Gazeta.uz” xabar berdi.

 JETRO’ning Toshkentdagi vakolatxonasiga ko‘ra, delegatsiya tarkibidan qurilish materiallari, elektronika, elektr xo‘jalik texnikalari, oziq-ovqat sanoati, kanselyariya mahsulotlarini ishlab chiqarish sohasida faoliyat ko‘rsatayotgan kompaniyalar hamda xalq iste’moli mahsulotlari eksporti agentligi (FMCG) vakillari o‘rin olgan.

Tashrif doirasida o‘zbek va yapon tadbirkorlari ishtirokida kooperatsion birja o‘tkazilishi ko‘zda tutilgan. 

Ma’lumot uchun, Yaponiya iqtisodiyot, savdo va sanoat vazirligi qoshida tashkil etilgan hamda 55 mamlakatda 74 ta xorijiy vakolatxonaga ega JETRO Markaziy Osiyo bo‘yicha faqat O‘zbekistonda faoliyat yuritadi.