Toshkent shahrida Yevropa tillari kuni nishonlanadi
Yevropa tillari kuni yana bir bor O‘zbekiston Davlat jahon tillari universitetida nishonlanadi. Bu haqda “Daryo”ga universitet matbuot xizmati xabar berdi.
Tadbir tashabbuskorlari qatorida Fransiya elchixonasi Britaniya Kengashi, Gyote Instituti va O‘zbekistondagi Yevropa Ittifoqi delegatsiyasi bilan birgalikda Yevropa milliy madaniy institutlar tarmog‘i (EUNIC) rahbarligida bayramda faol ishtirok etadi.
Yevropa Kengashi 2001-yildan boshlab har yili 26-sentabrni Yevropa tillari kuni sifatida nishonlab kelmoqda. Shu kuni dunyo bo‘ylab millionlab insonlar xorijiy tillarni o‘rganishga bag‘ishlangan hamda tillar xilma-xilligini targ‘ib etuvchi tadbirlarda ishtirok etadi. Bu yil Yevropa tillari kuni Toshkent shahrida 30-sentabrda, O‘qituvchi va murabbiylar kuni arafasida nishonlanmoqda.
O‘zbekistonda ham keng nishonlanib kelayotgan Yevropa tillari kuni yoshlar va chet tillari o‘qituvchilari o‘rtasida yildan yilga ommabop tus olmoqda. Tadbirdan ko‘zlangan maqsad — dunyodagi til va madaniyatlar xilma-xilligiga e’tibor qaratish.
Tadbirni diplomatik missiyalarning vakillari o‘z ona tillarida bir necha og‘iz so‘z bilan tantanali ravishda ochib beradi. Ochilish marosimidan so‘ng “O‘zbekistonda Yevropa tillari kuniga bag‘ishlangan videoklip” tanlovida ishtirok etgan o‘quvchi va talabalar tomonidan tayyorlangan videokliplar ketma-ketligi namoyish qilinadi.
Yevropa Ittifoqi delegatsiyasi, Fransiya elchixonasi, Gyote Instituti, Britaniya Kengashi, Toshkent Fransuz alyansi hamda Germaniya, Buyuk Britaniya, Ukraina, Gruziya, Chexiya Respublikasi, Polsha, Ruminiya, Slovakiya, Shveytsariya, AQSh elchixonalari Yevropa tillari kuni bayramida ishtirok etadi. Bir necha yuzlab talabalar va o‘qituvchilar tadbirda qatnashishi kutilmoqda.
