Qatar milliy termasini qabul qilib olgan mutaxassis Xorxe Fossati JCh—2018 3-saralash bosqichidagi unga qadar bo‘lgan ikki mag‘lubiyatga qaramay, optimistik ruhda ekanini qayd etdi. Murabbiyning matbuot anjumanida bildirgan fikrlarini “Championat.asia” Qatar Futbol Assotsiatsiyasiga asoslanib yozdi.
“Qatar termasi futbolchilariga ishonganim uchun ham termada ishlashga rozi bo‘ldim. Juda qiyin bo‘lishini bilaman, ammo men optimistik ruhdaman. Qatarning imkoniyatlariga ishonaman va bosh jamoaga qaytganimdan xursandman”, — deb gap boshladi urugvaylik murabbiy. U 2007—2008-yilgi mavsumlar davomida ham Qatarga ustozlik qilgan, keyinroq esa sog‘lig‘idagi muammolar sabab ishdan ketgandi.
Fossati Qatarni qayta qabul qilib olguniga qadar mahalliy “Ar-Rayyan” klubida ish olib borayotgandi: “‘Ar-Rayyan’ va uning muxlislaridan minnatdorman. Ular ‘As-Sadd’ bilan bo‘lgani kabi hamisha yuragimda qoladi. Men bu klublarda fantastik yillarni boshdan kechirdim”, — deb ta’kidladi Xorxe.
Ma’lumot uchun, Fossati “As-Sadd” bilan Osiyo Chempionlar Ligasining 2011-yilgi mavsumida chempionlikni nishonlagan. Bu muvaffaqiyat qit’a klublari miqyosidagi Qatarning yagona katta g‘alabasi hisoblanadi. U, shuningdek, o‘z jamoasiga Qatar Yulduzlar ligasining oltin medallarini ham olib bergan.
“Oldindagi ikki o‘yin qanchalik qiyin bo‘lsa, shunchalik muhim. Mas’uliyatni bo‘ynimga olganimdan ham bilingki, men Qatarning mundialda to‘p surishiga ishonaman. Biz buni amalga oshira olamiz. Qanchalik qiyin bo‘lmasin, futbolchilar o‘zini ko‘rsatishi uchun bor kuchimni ishga solaman”, — deb va’da berdi urugvaylik murabbiy.
Qatar 6-oktabr kuni Janubiy Koreyaga qarshi, 11-oktabrda esa Suriyaga qarshi maydonga tushadi.
Izoh (0)