Қатар миллий термасини қабул қилиб олган мутахассис Хорхе Фоссати ЖЧ—2018 3-саралаш босқичидаги унга қадар бўлган икки мағлубиятга қарамай, оптимистик руҳда эканини қайд этди. Мураббийнинг матбуот анжуманида билдирган фикрларини «Championat.asia» Қатар Футбол Ассоциациясига асосланиб ёзди.
«Қатар термаси футболчиларига ишонганим учун ҳам термада ишлашга рози бўлдим. Жуда қийин бўлишини биламан, аммо мен оптимистик руҳдаман. Қатарнинг имкониятларига ишонаман ва бош жамоага қайтганимдан хурсандман», — деб гап бошлади уругвайлик мураббий. У 2007—2008 йилги мавсумлар давомида ҳам Қатарга устозлик қилган, кейинроқ эса соғлиғидаги муаммолар сабаб ишдан кетганди.
Фоссати Қатарни қайта қабул қилиб олгунига қадар маҳаллий «Ар-Райян» клубида иш олиб бораётганди: «‘Ар-Райян’ ва унинг мухлисларидан миннатдорман. Улар ‘Ас-Садд’ билан бўлгани каби ҳамиша юрагимда қолади. Мен бу клубларда фантастик йилларни бошдан кечирдим», — деб таъкидлади Хорхе.
Маълумот учун, Фоссати «Ас-Садд» билан Осиё Чемпионлар Лигасининг 2011 йилги мавсумида чемпионликни нишонлаган. Бу муваффақият қитъа клублари миқёсидаги Қатарнинг ягона катта ғалабаси ҳисобланади. У, шунингдек, ўз жамоасига Қатар Юлдузлар лигасининг олтин медалларини ҳам олиб берган.
«Олдиндаги икки ўйин қанчалик қийин бўлса, шунчалик муҳим. Масъулиятни бўйнимга олганимдан ҳам билингки, мен Қатарнинг мундиалда тўп суришига ишонаман. Биз буни амалга ошира оламиз. Қанчалик қийин бўлмасин, футболчилар ўзини кўрсатиши учун бор кучимни ишга соламан», — деб ваъда берди уругвайлик мураббий.
Қатар 6 октябрь куни Жанубий Кореяга қарши, 11 октябрда эса Сурияга қарши майдонга тушади.
Изоҳ (0)