Prezident saylovini o‘tkazuvchi 14-Toshkent shahar okrug saylov komissiyasida brifing bo‘lib o‘tdi
Bugun, 27-sentabr kuni O‘zbekiston Respublikasi saylovini o‘tkazuvchi 14-Toshkent shahar okrug saylov komissiyasida birinchi brifing tashkil qilindi. Unda okrug saylov komissiyasi raisi Ahmadxo‘ja Yunusxodjayev OAV vakillariga okrug saylov komissiyasi tomonidan o‘tkazilgan birinchi majlis va unda qabul qilingan qarorlar haqida axborot berdi.
26-sentabr kuni Markaziy saylov komissiyasi tomonidan tasdiqlangan 14-Toshkent shahar okrug saylov komissiyasi a’zolarining birinchi majlisida okrug saylov komissiyasining Prezident sayloviga tayyorgarlik ko‘rish va uni o‘tkazish bo‘yicha asosiy tadbirlar dasturi haqida qaror qabul qildi. Shuningdek, Prezident saylovini o‘tkazuvchi 14-Toshkent shahar okrug saylov komissiyasining ish rejasi ham tasdiqlandi.
Qonunchilikka ko‘ra, okrug saylov komissiyasi a’zolari asosiy vazifasidan ozod etilishi mumkinligi ko‘rsatib o‘tilgan. Shunga ko‘ra, jarayondagi ish hajmining ko‘lami va hajmidan kelib chiqib, okrug saylov komissiyasi mas’ul kotibi Ixtiyor Bekovni asosiy vazifasidan ozod etish to‘g‘risida ham qaror qabul qilindi.
Majlisda saylov komissiyasi a’zolarining xizmat vazifalari taqsimoti, a’zolarning navbatchiligini tashkil etish, saylov uchastkalarini tuzishga tayyorgarlik ko‘rish to‘g‘risidagi masalalar ham ko‘rib chiqildi.
Okrug saylov komissiyasi a’zolari “O‘zbekiston Respublikasi Prezidenti saylovi to‘g‘risida”gi O‘zbekiston Respublikasi Qonunining joylardagi ijrosini nazorat etish va saylov uchastkalariga amaliy yordam ko‘rsatish maqsadida tumanlarga biriktirildi. Majlisda okrug saylov komissiyasining matbuot markazini tashkil etish haqidagi masala ham ko‘rib chiqildi. OAVlarda yetarlicha tajriba to‘plagan malakali mutaxassislardan iborat Matbuot markazi rahbarligiga Toshkent shahar hokimligi Axborot xizmati rahbari Husan Ermatov tayinlandi.
Toshkent shahar hokimligi vakillarining saylov okrugi joylashgan bino hamda okrug saylov komissiyasi joylashgan xonalarning moddiy-texnik ta’minlanganligi holati bo‘yicha axboroti tinglandi. Qonunchilikka binoan okrug saylov komissiyasining moliyaviy masalalari bo‘yicha mas’ul a’zosi ham belgilab olindi.
