Qirg‘izistonlik amaldor xizmat mashinasidan voz kechib, velosipeddan foydalana boshladi (foto)

Qirg‘izistonning Issiqko‘l viloyatida adliya boshqarmasi boshlig‘i ishga velosipedda borib kelmoqda. Bu haqda Turmush portali xabar bermoqda.

Aytilishicha, oxirgi ikki oy mobaynida boshqarma boshlig‘i Urmat Aquluyev ishga velosipedda kelmoqda. U xizmat mashinasidan voz kechdi.

Aquluyevning o‘zi bunga bir nechta sabab ko‘rsatdi. Avvalo, velosipedni unga akasi sovg‘a qilganini ta’kidlab o‘tdi.

“Akam bilan suhbat davomida velosipedda yurishni istashimni aytgan edim. U xursand bo‘lib, menga shu zahotiyoq velosiped olib berdi. Tan olaman, boshida pedal aylantirish qiyin bo‘ldi. Lekin hozir bu osonlashdi, o‘zimni ancha yaxshi his qilmoqdaman. Uydan ishgacha 10–15 daqiqalik yo‘l, lekin boshqa yo‘nalishdan yurib, yarim soat velosipedda kezaman”, — dedi u.

Amaldorning aytishicha, velosiped sog‘liqni yaxshilaydi, jumladan, yurak uchun profilaktika vazifasini o‘taydi hamda ortiqcha vaznni yo‘q qiladi. Ikkinchidan esa, oxirgi vaqtda avtomobillar soni ko‘paydi, bu esa ekologiyaga zarar keltirmoqda, deb hisoblaydi Aquluyev.

Nihoyat, uchinchi sabab sifatida u yoqilg‘i tejash masalasini keltirdi.