Peruda olti ming yil avvalgi “jinsi” mato topildi

Olimlar xalqaro guruhi to‘q ko‘k rang (indigo)ga bo‘yalgan dunyodagi eng qadimiy matoni topdi. Ayni paytda ushbu bo‘yoq jinsi mato tayyorlashda qo‘llaniladi. Ixtiro haqida Science jurnalida e’lon qilindi.

Artefakt Peruning shimoliy sohillaridagi Uaka Priyeta tepaligida aniqlandi. Olimlar so‘zlariga ko‘ra, paxta tolasidan qilingan mato parchasini topib olishganida, uning rangi to‘proq tufayli ko‘rinmagan. Ammo puxtalik bilan yuvib tozalangach, u ko‘k rangga bo‘yalgani ma’lum bo‘lgan. Kimyoviy tahlil natijalari bo‘yoq tarkibiga indigoning asosiy komponentlari — indigotin va indirubin kimyoviy birikmalari kirganini ko‘rsatdi.

Mutaxassislar hisob-kitoblariga ko‘ra, topilmaning yoshi olti ming yilga yetadi. Bungacha indigo rangidagi eng qadimiy buyum Misrda topilgan to‘rt ming yillik mato bo‘lagi hisoblanardi.