Madridning “Real” jamoasi hujumchisi Krishtianu Ronaldu “Sporting” klubiga qarshi (2:1) YChL guruh bosqichi ilk turida gol urib, ushbu bosqichda kiritilgan gollar soni bo‘yicha “Barselona” yetakchisi Lionel Messi hamda “MYu” va “Real”ning sobiq a’zosi Rud van Nistelroyga yetib oldi. Bu haqda “Chempionat” xabar bermoqda.
Ronaldu Yevropa Chempionlar Ligasi guruh bosqichida kiritilgan gollari sonini 50 taga yetkazib oldi. Xuddi shuncha gol Lionel Messi va Rud van Nistelroy hisobida ham bor.
YChL guruh bosqichida 53 ta gol kiritgan “Real” klubining sobiq hujumchisi Raul ushbu ko‘rsatkich bo‘yicha yetakchilik qilmoqda.
Ma’lumot uchun, Ronaldu YChLning barcha o‘yinlarida 93 ta, Messi 86 ta, Raul va van Nistelroy mos ravishda 71 va 56 tadan gol kiritgan.
Izoh (0)