“O‘zgidromet” dam olish kunlari kuzatiladigan ob-havo haqida ma’lumot berdi.
Unga ko‘ra, 14-dekabr, shanba kuni respublika bo‘yicha baʼzi joylarda yomg‘ir yog‘adi, shimolda yog‘ingarchilik (yomg‘ir, qor) kuzatiladi. Toshkent, Sirdaryo viloyatlarida faqat kechqurun biroz yomg‘ir yog‘ishi mumkin. Surxondaryo viloyatida va Farg‘ona vodiysi viloyatlarida yog‘ingarchiliksiz ob-havo saqlanib turadi.
14-dekabr kuni havo harorati kechalari 0-5 daraja iliq, kunduz kunlari 7-12 daraja iliq, baʼzi joylarda 15 darajagacha iliq, shimolda 2-7 daraja iliq atrofida bo‘ladi. 15-dekabrda O‘zbekiston hududiga shimoli-g‘arbdan nam va sovuq havo massalari kirib kelishi boshlanadi. Respublika hududida yog‘ingarchilik (yomg‘ir, qor) kuzatiladi, baʼzi joylarda kuchli bo‘ladi. Qoraqalpog‘iston Respublikasi, Xorazm viloyatida baʼzi joylarda biroz qor yog‘adi.
Havo harorati kechasi va ertalab 0-5 daraja iliq bo‘ladi, kunduzi 3 daraja sovuqqacha pasayadi, shimolda kechasi 5-10 daraja sovuq, kunduzi 2-7 daraja sovuq bo‘ladi.
Shamol 7-12 metr/sekund tezlikda esadi, baʼzi joylarda 13-18 metr/sekundgacha kuchayadi, 15—16-dekabrda ayrim joylarda 20-25 metr/sekundgacha kuchayishi mumkin. 15—16-dekabrda yo‘llarda yaxmalak kuzatiladi. Respublikaning ayrim joylariga tuman tushishi mumkin.
Toshkentda 14-dekabrda kechqurun biroz yomg‘ir yog‘ishi mumkin. Harorat kechalari 3-5 daraja iliq, kunduz kunlari 10-12 daraja iliq bo‘ladi. 15-dekabrda havo bulutli bo‘ladi, yog‘ingarchilik (yomg‘ir, qor) kuzatiladi. Shamol tezligi 10-12 m/s gacha kuchayishi mumkin. Harorat kechasi va ertalab 1-3 daraja iliq bo‘ladi, kunduzi 1-3 daraja sovuqqacha pasayadi. 16—17-dekabr kunlari havo harorati kechalari 8-13 daraja sovuqqacha, baʼzi joylarda 15 daraja sovuqqacha, kunduz kunlari 0-5 daraja sovuqqacha pasayishi kutilmoqda.
“O‘zgidromet” yakshanba kuni O‘zbekiston hududiga yana sovuq havo massalari kirib kelishi kutilayotganini, havo harorati keskin pasayishini avvalroq ma’lum qilgandi. Prognozlarga ko‘ra, O‘zbekistonda kelasi hafta boshida havo harorati 17 darajagacha sovuq bo‘lishi kutilmoqda.
Izoh (0)