Qozog‘iston parlamenti — Majlisda “Qozog‘iston Respublikasining ekstremizm va terrorizmga qarshi kurash bo‘yicha ayrim qonunchilik hujjatlariga tuzatish hamda qo‘shimchalar kiritish to‘g‘risida”gi qonun loyihasi muhokama qilinmoqda. Bu haqda Tengrinews xabar bermoqda.
Mamlakat milliy xavfsizlik qo‘mitasi raisining o‘rinbosari Marat Kolkobayevga ko‘ra, “Aloqa haqidagi qonun” aloqa tarmoqlarida tezkor qidiruv faoliyati bilan shug‘ullanayotgan idoraga kechiktirib bo‘lmas, og‘ir va o‘ta og‘ir jinoyatlar, shuningdek, jinoiy guruh tomonidan tayyorlanayotgan jinoyatlar amalga oshirilishiga olib kelishi mumkin bo‘lgan holatlarda tarmoqlar va aloqa vositalari ishini to‘xtatib turish huquqini berish imkoniyati bilan to‘ldirilmoqda.
Bunday ehtiyoj tug‘ilgan taqdirda 24 soat davomida Bosh prokuratura ogohlantirilishi lozim. Aloqa ishini to‘xtatib qo‘yish zarurati aksilterror operatsiyasi o‘tkazilishi davomida tug‘ilishi mumkin.
Qonun loyihasini ishlab chiquvchilariga ko‘ra, uning qabul qilinishi davlat idoralarining ekstremizm va terrorizmga qarshi kurashdagi samaradorligini oshirishga imkon beradi. Qonunning amalga oshirilishi respublika budjetidan qo‘shimcha mablag‘ ajratilishini talab etmaydi.
Izoh (0)